Entregamento di certificado di proyecto “Sport Entrepreneurship”

Sport Entrepreneurship, ta un colaboracion entre IDEA, Ministerio di Asunto Economico y Ministerio di Deporte, a inicia dia 30 october 2023 y a termina dia 26 februari 2024. 
Desde 2012, e unit IDEA ta ofrece un variedad di tayer riba diferente topico cu e proposito pa capacita nos comerciantenan chikito y duna nan e hermentnan necesario pa ta exitoso. Ta importante pa nos comerciantenan formalisa nan negoshi y reduci economia informal. Cu e tayernan aki, IDEA ta comparti cu esnan cu kier bira un comerciante, informacion y conocemento necesario pa start un negoshi.

A organisa e tayer di Sport Entrepreneurship pa esnan cu kier dedica na actividad deportivo comercial. E tayer a delinea un iniciativa strategico pa promove actividad comercial den deporte door di cultiva un cultura den cual deporte y negoshi por crusa otro y haci un impacto riba economia di Aruba y den region. Door di promove innovacion, crecemento economico, y un desaroyo di capacidad profesional, e proyecto aki por contribui na e evolucion di e industria deportivo y crea un panorama mas dinamico y vibrante pa negoshinan relaciona cu deporte.

Den e proyecto aki a splica kico Sport Entrepreneurship ta encera, su alcance y e tendencianan actual den e industria aki. A trata:

• e diferente manera cu por identifica oportunidadnan di negoshi den e industria desportivo;
• con pa crea un plan di mercadeo y di benta pa nan negoshi relaciona cu deporte; 
• tur loke ta relaciona cu maneho di finansa den negoshi, incluyendo presupuesto, pronostico, y relato financiero;
• a repasa tur cuestion legal y etico relaciona cu Sport Entrepreneurship;
• e uzo di tecnologia y innovacion; 
• E habilidad di liderazgo y ehercicio di teambuilding pa yuda participantenan crece den nan negoshi; 
• e importancia di sostenibilidad y responsabilidad di medio ambiente.

Na final e participantenan a desaroya e conocemento y habilidad necesario pa integra oportunidadnan di turismo deportivo den nan proyectonan di Sport Entrepreneurship. Esaki por inclui, start un agencia di biahe pa deporte, organisa eventonan pa turista relaciona cu deporte, of promove eventonan deportivo como atraccion pa turistico.

IDEA a selecciona un team di experto prominente pa e tayernan y a inclui expertonan for di diferente departamento di Gobierno, institucion y di sector priva. E combinacion diverso di nan background a trece conocemento amplio y completo den e tayernan. 
Durante e serie di workshop, un total di 18 participante a inverti nan esfuerso pa traha riba nan capacidad empresarial den e ramo deportivo. Di e 18 participantenan, un total di 13 a logra e certficado, demostrando nan dedicacion cu nan a participa na 70% di e workshopnan of mas. Ademas, 5 participante cu a logra un parti di nan participacion di entre 50% y 68%.

Dos participante a participa 100% na e proyecto. Nan a participa na tur e 9 topiconan di workshop, cu ta encera un total di 18 diferente workshop, durante un periodo di 22 dia di tayer. Nan ta sr. Jeremy Boekhoudt di ‘Sports4U Triathlon Academy’ y sra. Niurca Vrolijk di ‘Cemedar Centro Medico Deportivo Aruba’.

E participantenan cu a ricibi nan certificado y transcript, ta:Veronica Camara, Monica Pimentel, Giovanni Bermudez, Alexis Sierra, Naomi Vrolijk, Eugene Farro, Dillon Willems, Donovan Millan, Francis Maduro, Niurca (Gina) Vrolijk, Dokter Ricardo Vargas, Adrick Croes, Michael (Glennon) Eights, Ashwin Laaf, Jeremy Boekhoudt, J.A. Albee de Sousa Fernandes Perna, Rosemarie Maduro y Darwin Rogders.

E proyecto aki no solamente ta pa fortalece e participantenan, pero tambe pa duna un aporte significante na prosperidad economico di nos pais Aruba. Door di fomenta entrepreneurship, promove colaboracion, y cultiva perspectivanan fresco, por haci un impacto duradero riba e industria deportivo, y nos economia en general.