E meta di e concurso aki ta pa conscientisa comunidad, specialmente nos muchanan, riba e importancia di cuida nan mascotanan.

E aña aki, Ministerio di Enseñansa a organisa e concurso aki pa nos muchanan di scol den cual un total di 1222 mucha a participa, mustrando asina nan amor grandi pa nan mascotanan. A saca 30 ganado, 5 finalista di cada klas di scol basico cu a particpa y e ganadornan a ricibi un certificado y un regalito.

E concurso ta basa riba e Ley di Cacho. Un ley cu ta preveni pa cacho bira molester pa nos comunidad, pero tambe cu ta obliga e persona cu tin un cacho na e cuido minimo cu e responsabilidad aki ta trece cu ne. Cacho mester ta den cura y no riba caya. E concurso di pintamento ta yuda trece conscientisacion riba esaki, cuminsando cu nos muchanan di scol basico.

Gobierno a gradici tur e ganadonan pa nan tempo y dedicacion pa participa na e concurso aki, na mayornan y docentenan cu a stimula e muchanan no solamente cu pintamento y arte pero tambe pa e amor na nan mascotanan.

Ta haciendo esfuerso pa e topico importante aki drenta curriculum di scol y haci’e structural na unda muchanan ta siña di derecho y debernan cu tin pa cu mascota. Ademas ta trahando ribe e plan nacional pa percura cu no lo tin molester di cacho riba caya mas. Gobierno ta satisfecho di mira con Aruba a avansa y con hopi amor tin na Aruba pa nos mascotanan.