Minister di Finansa y Cultura, Xiomara Maduro a informa cu hunto cu e cobransa di BBO na frontera tin un simplificacion y cambio den tarifa di impuesto riba importacion (invoerrechten) di varios producto. E Decreto Ministerial pa introduci e simplificacion y rebaho den invoerrechten a keda publica dia 26 di juli 2023 den ‘Afkondigingsblad 2023No.28’. Den e lista cu ta compaña e Decreto Ministerial "Regeling tijdelijke tariefsverlagingen invoerrechten", por mira tur categoria di producto pa cual nan tarifa di impuesto lo baha desde 1 di augustus proximo. Ta trata aki di mas di 660 post cu ta conoce un cambio. Aki ta sigui algun ehempel pacategoria di producto.

Cuminda y bebida
E tarifa di importacion riba algun producto di cuminda y bebida ta baha, por ehempel:

• Productonan pa cual tabata cobra 6% manera buttermilk, baking powder, yoghurt cu fruta of cacao y azeta, ta bira 0%;
• tarifa di 12% pa chuculati y coconut milk ta baha na 6%;
• binager y cuminda pa bestia tambe ta baha di 12% pa 6%. E tarifa pa oester ta baha di 32% pa 22%.

Aparato pa genera energia berde, vehiculo electrico y auto:

• Pa aparatonan cu ta consisti di energia y aparato pa genera energia berde e tarifa ta baha di 2% pa 0%. Esaki ta conta pa airco di tipo inverter, airco di sistema VRF y VSV, frigidair, freezer y vitrinanan di energia eficiente, wasmashin y dryer di energia eficiente, tambe bombio di luz di energia eficiente y bombio di LED. Turbina di biento y parti di dje y solar panels y parti di dje tambe ta conoce un reduccion di tarifa di 2% pa 0%;
• e tres diferente invoerrechten pa auto di respectivamente 30%, 40% y 50% ta bira un solo tarifa di 32%. Pa vehiculo electrico, di transporte di 10 persona of mas, brommer, segways y bais electrico e tarifa ta baha di 2% pa 0%.

Producto di industria di textiel, instrumento musical y buki:

• Tarifa di importacion pa algun producto di industria di textiel manera tela, serbete, cortina y klechi di cama, tambe ta baha di 12% pa 6%;
• tarifa di importacion riba instrumento di musica manera clarinet, trompet, saxofon y fluit a conoce un reduccion di 22% pa 12%;
• tarifa di buki ta baha di 6% pa 0%. Esaki ta encera buki di dibuho, pintura, color pa mucha, buki di musica, skirbi, imprimi of ilustra, material cartografico imprimi di tur sorto (atlas, mapa mural-, y globo).

Material pa construccion y otro productonan:

• Tarifa di importacion pa material di construccion cu actualmente ta 10% ta baha na 6%;
• ya reduci e tarifa di importacion di otro productonan, manera stempel, djente sintetico/artificial, mashin pa stimula curason di 12% pa 0%;
• pa hangers, tabla pa strika paña, glas di bebe y decoracion, articulo di cushina (cuchiu, forki), pampers pa baby, tampons, e tarifa ta baha di 12% pa 6%.

Pa mas informacion, por tira un bista riba e Decreto Ministerial "Regeling tijdelijke tariefsverlagingen invoerrechten", hunto cu e lista di e tarifanan cu ta conoce un rebaho: