Invitado special pa e encuentro aki lo ta sra. Ange Jessurun for di Corsou cu lo presenta su buki Faya Lobi. Faya Lobi ta nifica Vurige liefde, Amor ferviente. Faya Lobi, 200 aña di amor ferviente den diaspora. Pa dos siglo e novela ta sigui e travesia y diaspora di un famia Surnameño-Curasoleño. E novela lo hiba e lesado riba un biahe di descubrimento pa medio di historia di e famia, yen di pasion.

Autor Dominico Werleman lo presenta su buki nobo, ‘Hallo! Mi ta sapato drechi di Mauricio’. E buki ta contene un coleccion di storia cortico, experiencianan personal te cu realismo magico. Unabes bo cera conoci cu e sapato pia drechi di Mauricio, ta dificil pa los su feter! Riba e anochi aki lo tin presentacion di e grupo musical, Ivy y su grupo tipico.

Mirto Laclé lo duna un introduccion encuanto Puente Proverbial y Odo. Lo ta un anochi multidisciplinario cu musica, canto, baile, charla, presentacion di buki y declamacion. Entrada pa e actividad aki ta gratis. Pa mas informacion por tuma contacto cu Mirto Laclé na 742 6274. Biblioteca Nacional Aruba hunto cu Departamento di Cultura Aruba y Mirto Laclé lo presenta e programa literario, cultural y linguistico II den cuadro di conmemoracion 160 aña abolicion di sclavitud.

Kende ta Ange Jessurun?
Ange Jessurun a nace na Corsou y pa hopi aña ta brinda un aporte na formacion y desaroyo di conscientisacion cultural, cu atencion special na hubentud. E temanan aki ta un liña cora constante den su escogencia di bida y di su carera. Ange ta co-autor di diferente metodo di enseñansa di Papiamento y e ta mama spiritual di Arte di Palabra, un competencia skirbi na Papiamento pa educacion secundario. Tambe Ange a publica cuater coleccion di trabao di Arte di Palabra.

‘Faya Lobi’ ta su prome novela y ta basa riba cuenta y storia, recuerdonan y documento historico y real. E storia di su bisawelo, cu na aña 1865 ta biaha cu bapor, di Hong Kong pa Surinam, en busca di un miho bida. Esaki tabata e chispa – candela di amor- cu a hiba Ange Jessurun na skirbi e historia di bida di su mayornan y su antepasadonan. Na aña 1865 Atsjak ta sali di Hong Kong cu contract pa traha na Paramaribo, Surinam.

Durante e travesia e ta cambia su nomber pa Jong Baw, pa miedo di hende di color. Sinembargo, unabes na Surinam e ta namora di Emelia, un dama di color. Na aña 1859 Emelia y henter su famia ta keda libera di sclavitud. E nieto, Antonius, ta barca pa Corsou, no obstante e resistencia di su tata. Na Corsou Antonius ta topa cu Angela, e amor di su bida. Dicho amor ta parce imposibel. Angela ta descendiente di doño di plantashi Specht, cu a cuminsa cu plantashi Koraal Specht na aña 1660.

Pa dos siglo e novela ta sigui algun generacion Specht y ta descubri con e tata di Angela ta opone e amor entre Angela y Antonius durante seis aña largo. Despues di su aprobacion ta spera e pareha un espera largo, pa despues por fin e enlace matrimonial por tuma luga. Angela y Antonius ta feliz cu nan shete yiunan. Despues di morto di Angela, ta nombra un skol na su honor y un yiu muhe ta cuminsa un buskeda pa sa descendencia di su mayornan y e storia tras di nan amor ferviente.

‘Faya Lobi, 200 aña di amor ferviente den diaspora’, lo hiba e lesado riba un biahe di descubrimento, pa medio di un historia di famia Surnameño-Curasoleño, yen di pasion.