E reunion a conta cu e stakeholders den e proyecto di restauracion di Cas Veneranda na Wilhelminastraat, cual a keda construi na 1936 pa Frederico Maximiliaan (Machi) Arends. E arkitecto tabata e renombra bouwmeester Dada Picus, cu a bay Cartagena, Colombia pa busca inspiracion for di un edificio cu e esposa di Machi, Maria Veneranda, tabata enamora di dje, y asina a bolbe Aruba pa construi e edificio cu awe nos ta yama Cas Veneranda. Un di e casnan mas grandi na Aruba di e tempo ey, traha den un estilo neobaroco Latinoamericano.

Dia 20 di april 2023, Minister Geoffrey Wever, hunto cu Director di Monumentenfonds y directiva di SMFA, APFA y un representante di famia Arends, e doñonan di Cas Veneranda, a anuncia un acuerdo pa cumpra, restaura y huur e edificio di Cas Veneranda.
Awor SMFA por sigui cu e plan pa restauracion, pa cual a presenta e fasenan di e proyecto. Hoevertsz Archidesign N.V. ta encarga cu ehecucion di e proyecto di renobacion.

Cu e compromiso aki, Fundacion Monumento Aruba a logra haya prestamo di Nationaal Restauratie Fonds cu un interes di 2%, y financiamento local di APFA pa completa e inversion.

Embeyecemento di nos centro di ciudad solamente, no lo “traduci” na e ciudad vibrante cu nos tur ta anhela. E ta tuma un compromiso serio di parti gobierno pa haci e imposibel, posibel. Inversion den e iluminacion, vegetacion, siguridad, parkeo y infrastructura di e ciudad ta facilita crecemento. Trece departamentonan di gobierno den caya ta crea un fluho automatico di hende cu ta trafica den e area, un fluho diario durante dia den nos centro di ciudad, cu lo ta cliente pa e negoshinan den playa.