E casonan di tuberculosis na KIA no ta un menasa pa Salud Publico na Aruba y ta bou control

Departamento di Salud Publico Aruba ta monitoria di cerca e desaroyo tumando luga na KIA y ta comprometi den esfuersonan continuo pa atende cu tuberculosis debidamente, specialmente relaciona cu e 2 casonan activo cu tin actualmente.  

Na december, algun sintoma respiratorio a presenta na KIA cerca algun detenido manera tos, aunke esaki no tabata un indicacion directo di tuberculosis. Na januari, ora e sintomanan a persisti y bira mas fuerte, a haci un test PCR di sputum, pa cual a bin resulta cu un detenido a test positivo y durante e luna di februari, dos mas a resulta positivo pa tuberculosis activo. Un di e prome casonan activo no ta den KIA mas, e ta afor y ta vigila su tratamento via nos seccion di malesanan contagioso (Dienst Besmettelijke Ziekten). 

Dr. Rodriguez di Korrectie Instituut Aruba a splica e situacion actual di e casonan di tuberculosis na KIA, caminda a constata cu tin 2 detenido cu casonan positivo actualmente y un cantidad di 3 detenido cu ta positivo pa tuberculosis latent cu tambe ta bou di tratamento profilatico. E cantidad di 8 caso positivo cu PPD test + asintomatico (tur despues di un screening na 'close contact' di casonan index). Pa cu e 'contact onderzoek' haci door di  Seccion di Malesanan Contagioso (Dienst Besmettelijke Ziekten), nos a haci test cu 25 detenido, di cual 8 a resulta positivo pa PPD (11 di april, 2025). E personanan aki no tin problema respiratorio pues nan no tin sintoma. Lo haci mas test e siman aki ainda.

Mesora a activa e protocolnan estableci pa PAHO/WHO y a tuma e medidanan necesario pa cu e mico-bacteria aki. A isola e detenidonan infecta y a cuminsa nan tratamento debidamente. Tambe a limita e bishitanan pa e detenidonan y a haci un investigacion di esnan cu a tene contacto cu esnan infecta. A tuma testnan di PPD y implementa extra medidanan preventivo pa para e propagacion.

Na e momento aki, staf y personal di KIA ta liber di contagio. Esnan cu tabata den contacto cu e detenidonan infecta ta den observacion y bou guia medico.  E situacion ta bou control, caminda lo sigui monitoria e mico-bacteria aki pa garantisa cu e casonan di e malesa aki no lo aumenta den KIA. Den contexto actual, nos ta keda atento y ta sigui tur e proceduranan vigente pa fortalece e manera di identifica sintomanan na un fase mas trempan.