DVG ta publica liña di maneho riba zonido

Nos oido ta sumamante importante pa nos salud general y nos funcionamento diario. Hopi no ta realisa su importancia te ora cu nan cuminsa tuma nota di perdida di nan oido. E lamentabel ta cu unabez nos perde parti di nos oido, esaki nos no por recupera mas. P’esey ta importante pa nos proteha esaki ora nos tin e y si acaso tin hende a perde cierto parti di nan abilidad pa scucha bon, ta importante pa nos cuida loke nos tin ainda.

Tur aña di nobo durante temporada di Carnaval e topico aki ta bin na vigor. E pregunta cu ta haci continuamente ta; kico of cuanto ta un zonido responsabel cu ta contribui na conserva y perserva e oido di e participantenan pero tambe musiconan, espectadonan y esnan trahando durante e evento musical?

Den cuadro di salud, DVG riba dia 24 di januari 2025 a publica den Landscourant van Aruba un liña di maneho pa cu eventonan musical. Un liña di maneho compila cu ayudo di diferente stakeholder. E liña di maneho aki ta duna conseho riba e topico di zonido den eventonan musical manera entre otro Carnaval y Concierto, sea den espacio interior of exterior. Ta e meta cu e liña di maneho aki den futuro lo
forma e base pa cu cumplimento di e ley “Hinderlijke geluidenverordening”.

Maneho interior cera; pa cu e temporada di Carnaval e liña di maneho aki ta duna como conseho pa mantene zonido den un espacio interior cera te na un maximo di 90db midiendo esaki para entre e comienso di e escenario (stage) te cu mas leu unda publico por para.

Maneho interior den aire liber, pa eventonan interior den aire liber (jump in) e conseho ta pa mantene e cantidad di zonido na un maximo di 100db te cu 12pm y despues di 12pm te na un maximo di 95db midiendo esaki para pafo na e ‘grens’ di e localidad. E diferencia den db cu ta cambia den cuadro di e orario ta relaciona cu e maneho di Hinderlijk geluidenverordening di 1998.

Parada di Carnaval

Pa locual ta e conseho cu DVG ta duna pa cu maneho di zonido durante parada di Carnaval esaki ta maximo 90db midiendo esaki para na un distancia di 10 meter for di e speakernan cu ta produci e zonido.

Añanan anterior durante midimentonan di zonido cu a tuma luga durante parada di Carnaval, DVG a midi cerca algun banda musical un maximo di 115db cu ta un zonido cu no solamente ta causa daña na oido di hende pero ta asta por desregula e ritmo di curason di un persona, ocasiona stress y iritacion.

E liña di maneho aki cu DVG a produci ta pa duna un guia na entre otro companianan di zonido y nan tecniconan pa contribui na salud di e oido di nos tur.

Pa por ricibi mas informacion riba e liña di maneho aki cu ta hiba e nomber:

‘Richtlijn Hinderlijke Geluidsnormen voor Muziekevenementen’  

Pa mas informacion like nos Facebook page Directie Volksgezondheid DVG Aruba,
Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na servicio@dvg.aw.