IOC-UNESCO ta e instancia di Nacionnan Uni encarga di apoya ciencia y servicionan oceanico riba nivel mundial. Den e sesion di e asamblea lo discuti e maneho mundial di ciencia oceanico pa e proximo 2 aña. Riba 23 di juni 2023, sr. Oduber a duna un presentacion como president di comite di directiva di IOCARIBE. IOCARIBE ta e representacion di IOC-UNESCO pa regio cu ta inclui, Merca te Brasil.

E presentacion tabata principalmente relaciona cu e trabou y retonan di IOCARIBE y recomendacionnan cu paisnan regional a aproba na Bogota, Colombia luna pasa. Sr. Oduber su presentacion a inclui actualisacion di e decada ciencia oceano den Caribe. Tambe a informa e paisnan cu lo ubica un oficina regional di coordinacion di e decada di ciencia oceano na Colombia.E oficina lo yuda coordina y implementa e decada miho den Caribe. Tambe IOCARIBE lo yuda paisnan cu nan capacidad di ciencia maritimo y pa haci observacion maritimo. E aumento den capacidad di observacion lo yuda e infrastructuranan di alerta tempran. Adicionalmente a elabora riba e alganan peligroso, como tambe sargassum cu ta sigui ta un problema pa Caribe. IOCARIBE lo bin cu un sistema regional di alerta tempran pa esaki.

A informa tambe tocante derame di petroleo, unda Trinidad ta e unico pais den Caribe cu a obtene training di Merca pa analisa posibel derame y pronostica su movecion via satelite y modelonan. IOCARIBE lo coordina cu Merca pa nan train otro paisnan den Caribe. E paisnan miembro di IOC a bay di acuerdo tambe pa IOCARIBE priorisa participacion di SIDS (paisnan chikito den desaroyo) y hobennan den e area di ciencia marino, y pa yuda paisnan bin cu nan comision di decada pa oceano. Na final di presentacion di dr. Oduber e paisnan miembro a acorda e plan di IOCARIBE pa e periodo 2024-2025.