Durante e reunion, e delegadonan di e paisnan miembro a eligi un hunta di directiva nobo. E directiva di e comite nobo ta consisti di presidente dr. Marck Oduber (Aruba/Reinado Hulandes), vice presidente dr. John Cortinas (Merca), 2do vice presidente dr. Roberto Dantas de Pinho (Brazil), 3er vice presidente dr. Soraya Silva (Venezuela).

Pa un candidato cualifica pa un posicion den e comite di directiva di IOCARIBE e mester tin un nivel academico halto den ciencia natural, conocemento amplio di e ciencia oceanico, IOCARIBE su programa regional y IOC-UNESCO su programa global. IOC (Comision Oceanografico Intergubermental) di UNESCO ta e instancia di Nacionnan Uni encarga di apoya ciencia y servicio oceanico riba nivel mundial. IOCARIBE ta e representacion di IOC pa regio cu ta inclui, Merca te Brasil. IOCARIBE ta responsabel pa promocion, desaroyo y coordinacion di IOC su programa di ciencia maritimo, y otro actividad relata cu lama, y desaroyo di capacidad pa e region Caribense y paisnan cercano. Durante e reunionnan na Colombia a repasa e progreso principal di e periodo 2021 pa 2023 y a fiha e plan strategico pa 2023-2029.

E temanan principal ta inclui:

• Prioritisa un plan regional di ciencia maritimo den cuadro di prioridadnan di e decada di ciencia desaroyo sostenibel. Lo enfoca riba e impacto maritimo den regio, cu ta inclui sargassum, alganan peligroso, tempestad y nan efecto maritimo, y aumento di nivel di lama.
• Fortalece e vision di IOC-UNESCO pa apoya paisnan regional pa un economia oceanico sostenibel door di maximalisa e beneficionan di ciencia oceanico.
• Invulcra den un forma mas estrecho cu interesadonan y/o usuarionan, en especial e sector turistico cu ta haci hopi uzo di dato y informacion di ciencia maritimo.
• Lo invulcra mas hoben y/o academico hoben den ramo di lama via beca y/o stage.
• Lo asisti paisnan regional den establece infrastructura , y conocemento den aplica e principionan di FAIR y CARE durante uzo y intercambio di dato maritimo.
• Lo activa bek e programa IOCARIBE-GOOS cu lo enfoca riba observacion y pronostico regional pa lama incluyendo capacitacion di expertonan den e ramo aki.

E decada di ciencia oceanico pa un desaroyo sostenibel lo continua te cu 2030 y ta keda un prioridad den IOCARIBE su maneho. E decada su meta ta pa logra cu ciencia maritimo ta di un nivel debido pa asina por informa debidamente interesadonan, y politiconan pa nan por tuma accion eficiente pa maneho duradero relata na actividad di lama.