Dos Fish Aggregating Devices instala pa impulsa pesca sostenibel

E iniciativa aki ta un innovacion clave pa practica di pesca mas eficiente y sostenibel, protehando nos habitat marino y aumentando e produccion di pisca.

E introduccion di e dos FAD ta un cambio fundamental pa e sector y ta duna piscadonan un metodo nobo pa atrae pisca for di e area sin daña e ecosistema. Ta spera cu den 4 pa 6 siman, piscadonan lo mira un aumento den cantidad di pisca den e area, optimalisando nan rendimento y reduci costo di operacion.

A instala cada FAD na e siguiente cordinatonan:

• Cabes di Aruba: N 12.28.240 | W 069.49.477;
• Noord oost di Aruba: N 12.41.286 | W 70.05.266.

Ta recorda piscadonan cu no ta permiti mara of ancra na e FADs. Esaki ta pa garantisa nan durabilidad y funcionalidad.

E avanse tecnologico pa e industria di pesca
FADs ta conoci mundialmente como un innovacion pa pesca eficiente. E structuranan ta flota na lama y ta atrae un variedad di pisca manera dorado, tuna, mulato y balahu, creando un area optimal pa pisca sostenibel.

E beneficio di e FADs ta hopi amplio:

• Eficiencia mas halto – Piscadonan por bay direct na e FADnan, sin perde tempo buscando pisca, asina ta gasta menos fuel;
• Ingreso mas halto – Operacion mas eficiente ta trece un ambiente economico mas grandi pa piscadonan y charter boats;
• Consumo di pisca fresco – Mas disponibilidad di pisca fresco local lo yuda pa pueblo come mas saludabel;
• Desaroyo Economico – Aumento di produccion y benta di pisca ta contribui na economia local incluyendo di restaurantnan.

E instalacion di e FADnan ta e resultado di un colaboracion entre Varadero, Santa Rosa y Ministerio di Naturalesa. Cada FAD ta diseña pa sostenibilidad a largo plaso, consistiendo di un boei di superficie y un sistema di ancra resistente, uzando cabuya di Dyneema. E realisa e proceso di instalacion cu un barco comercial y un boto di apoyo, mientras expertonan a
inspecciona tur conexion bou di e boei pa garantisa su siguridad. E sistema automatico di identificacion (AIS) ta cendi, pues tur barco por wak e FAD nan posicion riba nan "AIS", asina percura cu barconan no pasa ariba nan.

Pa e FADnan por cumpli cu nan mision, ta importante pa respeta e regulacionnan y mantene e structuranan den bon estado:

• No por ancra of mara boto na e FADs;
• No por uza red chikito of catch pisca chikito rond di e FADs;
• Mantene distancia sigur pa evita daño na e structura;
• Raporta cualkier problema na e team di Varadero.

Pronto lo implementa un maneho di comunicacion pa garantisa cu piscadonan por ta informa y haña solucion rapido na cualkier situacion relaciona cu e FADnan.

E instalacion di e FADnan ta demostra e compromiso di e sector di pesca pa promove innovacion, sostenibilidad y crecemento economico. Pa mas informacion por tuma contacto cu Santa Rosa Aruba of Varadero Aruba.