DNM a crea e Standard Operation Procedure (SOP) pa mantencion y cuido di manglo

Den e SOP ta menciona e matanan di manglo cu nos tin aki na Aruba:

• Fofoti (Conocarpus erectus);
• Mangel preto (Avicennia germinans);
• Mangel shimaron (Laguncularia racemosa);
• Mangel Tam (Rhizophora mangle).

Tambe e procedura na momento di nan mantencion ta describi den e SOP. Cu mantencion ta referi na snoeimento. Ta prohibi (Landsbesluit bescherming inheemse flora en fauna AB” 2017 no. 48) pa kap, tira abou, kita of haci daño na un di e manglonan aki sin un permiso di excepcion (ontheffings procedure). E SOP ta traha a base di e leynan “Natuurbeschermingsverordening (1995) y tambe e maneho Build with nature (2019) cu ta accesibel via website di www.dnmaruba.org.

Por cuida y mantene mata di manglo den e areanan urbano, comercial, residencial, bufferzone/overgangsgebied, residencial cu balor y landelijk gebied (rural) (ROP2019) pa accesibilidad y pa motibo di seguridad.

Den e SOP ta indica e responsabilidad di cada departamento den cuido di e manglonan. DOW ta encarga cu mantencion y cuido den naturalesa y den areanan protegi. Fundacion Parke Nacional Arikok (FPNA) ta responsabel pa conservacion di e matanan den e areanan asigna na FPNA. Bureau City Inspector (BCI) y DNM ta atende cu keho y notificacion ora ta concerni e matanan di manglo. E inspectornan di BCI ta verifica y atende e kehonan aki y ta raporta e situacion di e manglonan na minister concerni, polis (KPA), Ministerio Publico (OM) y autoridad internacional CITES. E SOP Mantencion di Matanan di manglo ademas ta describi e procedura di mantencion pa cada tipo di manglo y ta inclui e temporada y tamaño, como tambe un specificacion detaya di e proceso di snoeimento.

E ecosistema di manglo ta importante pa un cantidad di motibo:

• Ecosistema di manglo ta provee den su reisnan, cuminda y habitat pa cantidad di sorto marino. Tambe ta duna proteccion y ta ideal pa pone webo;
• manglo ta proteha nos costa contra erosion. E reisnan di manglo ta wanta e subsuela di lama y ta yuda proteha e costanan den temporada di mal tempo y desaster natural, manera tsunami of horcan;
• manglo ta yuda drecha calidad di awa, ta absorba nutriente y contaminante for di awa y haci’e mas adecua pa bida marino;
• manglo ta un tipo di ecosistema yama carbon blauw. Esaki kiermen cu nan ta contene e carbon dioxide nan reis y tehido.

Manglo ta enfrenta varios reto:

• Destruccion door di desaroyo di costa, manera dredging, yenamento di beach y tambe construccion.
• e manglonan por sufri di polucion debi na "agricultural run off", cu ta awa di yobida of di irrigacion di tereno di cultivo cu ta drenta lama. E awa aki ta contene pesticida y no ta debidamente procesa/filtra.
• piscamento den gran escala. Esaki ta reduci e populacion di pisca y otro animal cu ta depende di matanan di manglo pa biba y come.
• cambio di clima ta causa cu e nivel di lama ta subi, y ta causa cu e ecosistema di manglo ta inunda.

Restauracion di manglo ta sumamente importante y ta responsabilidad di comunidad pa cuida esaki. Replanta manglo cu ta deteriora of unda a kita nan. Proteha manglo existente den e areanan marino cu ta proteha manera Spaans Lagoen y Mangel Halto. Regula desaroyo cu ta tuma luga na nos costa y rifnan.