Directie Voogdijraad (DVR)

Directie Voogdijraad ta e instancia pa proteccion di mucha na Aruba y ta resorta bou di Ministerio di Husticia. Nos tarea principal ta proteccion di menor di edad pa promove nan desaroyo pa adulto.

Directie Voogdijraad pa ley ta autorisa pa crea medida pa proteccion di mucha pa proteha menor di edad.

Directie Voogdijraad ta defende derecho di mucha, pa ken su desaroyo y criansa ta menasa. Pa logra esaki ta haci investigacion riba risico y factor di proteccion cu tin den e famia, unda e interes di e mucha ta central

Di e forma aki Voogdijraad por determina si un medida di proteccion di mucha ta necesario pa garantisa e siguridad y desaroyo di e menor. Ta haci investigacion denter di un cuadro multi-disciplinario unda ta investiga ambiente directo di e menor, manera instancia y scol. Si for di e investigacion ta resulta cu e derechonan fundamental di menor ta den peligro, e ora ey Directie Voogdijraad lo tuma e pasonan necesario pa proteha e menor. Proteccion ta sosode tanto riba tereno social como financiero.

Formanan di proteccion:

• Haya un orden  pa pone bou di autoridad
• Pone bou di supervision temporario
• Pone bou di supervision
• Dispensa (ontheffen) di tutela
• Kita autoridad paternal

Directie Voogdijraad ta segun ley e organo di conseho pa Corte den casonan cu ta trata menor di edad. Ta trata di casonan di cambio di voogd, casonan di adopcion, casonan di paternidad, etc.

Meta

“Pa garantisa y proteha e derecho fundamental di menor di edad p’asina e por tin un desaroyo saludabel y balansa den su desaroyo y crecemento pa bira independiente”

Tareanan 

• Duna informacion na publico via di e assistent social y e assistent financiero;
• Haci investigacion ora tin sospecho di maltrato di mucha, abuso y negligencia;
• Interveni durante crisis den caso di menasa severo pa e desaroyo di un menor;
• Percura den caso cu esaki ta urgente y inmediatamente necesario pa haya e medida di proteccion di mucha relevante, pa por evita decadencia moral, fisico y mental;
• Cuido di un menor cu segun algun orden legal door di Hues of  Ministerio Publico a  keda poni bou di proteccion di VoogdijraadDuna conseho pa medio di un representante, riba peticion of no, na huesnan den tratamento di casonan di derecho familiar den casonan di dunamento di custodia, determina e luga di residencia principal y e derecho di bishita di e mayornan den caso nan di divorcio of di separacion di mesa y cama;
• Haci investigacion, riba peticion di Hues, riba e situacion ambiental y financiero (autoridad di mayor, luga principal di residencia oficial, bishita y alimentacion), decision tocante voogd y/of cambio y peticion di adopcion, ta traha rapport y ta duna conseho riba esaki;
• Ta fungi como curator special riba asuntonan di paternidad di un menor, nombra pa  Corte den Prome Instancia. Voogdijraad ta representa e interes di e menor durante tratamento di e caso riba base di e akte van uitlating (acta di expresion di opinion) entrega;
• Mediacion den alimentacion y peticion di stipulacion legal di alimentacion riba peticion di e mayor cu ta encarga cu cuido di e menor.Percura pa e suma entrega na Voogdijraad pa mantencion di e menor wordo paga na esun cu tin derecho riba e suma;
• Percura pa por facilita autoridad riba un menor ora keda conoci cu un menor no ta para bou di autoridad rekeri pa ley of no ta eherce e autoridad aki riba dje;
• Intermediacion pa por trata/ bishita e menor riba peticion di un di e mayornan y/of Corte;
• Duna declaracion di autoridad paternal.  

Fuente: www.org.aw