Directie Ouderenzaken ta conoce su Directora den persona di Desireé Helder
ORANJESTAD - Ministerio di Adulto Mayor ta anuncia nombramento di dr. Desireé Helder como directora di Directie Ouderenzaken. Cu un carera remarcabel, cubriendo mas di 20 aña como Hefe di Departamento na Central Bureau Statistieken (CBS), dr. Desireé Helder ta trece un nivel incomparabel di experiencia y conocemento cu ta alinea perfectamente cu e mision di Directie Ouderenzaken.
Despues di a caba su estudio na Nijmegen, Hulanda, unda e la studia Neuro- en Revalidatie-psychologie, dr. Desireé Helder a cuminsa cu un promotieonderzoek na Universidad di Leiden, enfocando riba e malesa neurodegenerativo Huntington. E investigacion aki a concentra riba con pashentenan y nan famia ta biba cu e malesa y con nan ta maneha e desafionan emocional y mental. Na 2002, dr. Desireé Helder a logra su doctorado (Ph.D.) na Universidad di Leiden mientras cu e tabata Docente Universitario den e Facultad di Medicina.
Na 2004, dr. Desireé Helder a bolbe Aruba, unda e la tuma un puesto na Central Bureau voor de Statistiek (CBS) como estadisticus di salud. Eventualmente dr. Desireé Helder a bira hefe di Departamento di Proyecto y Investigacion y na 2018, dr. Helder a asumi e rol di Waarnemend Directeur di CBS. Durante su carera na CBS, dr. Desireé Helder a investiga y publica raportnan riba temanan importante cu ta impacta nos adultonan mayor, entre otro e prevalencia di incapacidad, riesgo di malesa cronico, y salud mental.
Despues di un proceso amplio, dr. Desireé Helder a cuminsa oficial dia 15 diseptember 2024 como directora di Directie Ouderenzaken. Como directora e ta encarga cu implementacion di maneho di Ministerio di Adulto Mayor y proyectonan cu ta enfoca riba e bienestar, cuido y participacion di adulto mayor na Aruba, un sector cu ta conta pa 23% di nos populacion y cu ta creciendo dia pa dia mas. E mision di Directie Ouderenzaken ta pa centralisa un sistema di cuido integral, cu servicio tanto pa cuido formal como informal, y pa sigura cu nos adultonan mayor ta haña e atencion y respet cu nan merece.
Dr. Desireé Helder su liderato y amplio conocemento den e campo di investigacion y estadistica lo yuda pa desaroya y implementa un sistema di cuido responsabel y informa pa e grupo vulnerabel aki.
