Directie Luchtvaart cu accion di control riba rampa
ORANJESTAD - Recientemente Directie Luchtvaart Aruba (DLA), a tene un accion di control riba rampa na Aruba su aeropuerto unda a haci 21 inspeccion.
Inspecteurnan di Directie Luchtvaart, conhuntamente cu dos colega di Hulanda, a conduci inspeccion detaya riba avion grandi, chikito, comercial y priva durante orario operacional regular di Aeropuerto. Entre otro, a controla licencia di pilotonan, papel di e avion, estado tecnico di e avion, e instrumentonan y tur detaye den cabina.
Den caso cu haya discrepancia ta zorg pa e aerolinea en cuestion coregi esaki debidamente.
Directie Luchtvaart ta conduci inspeccion di rampa regularmente. Sin embargo, recientemente, a dicidi pa tene un siman di accion, na unda durante un periodo di algun dia, a haci un cantidad grandi di inspeccion.
Mirando cu Aruba ta oficialmente den e proceso di afiliacion na e programa di inspeccion di rampa di Union Europeo “SAFA” (Safety Assessment of Foreign Aircraft) a haci e inspeccion e biaha aki conhuntamente cu 2 inspector Hulandes.
Aruba ta sigui ehemplo di otro paisnan grandi manera Canada y Brasil, pa join e programa importante aki, y asina contribui na e SAFA database, pero na mes momento ta beneficia di e gran cantidad di data cu ta bira disponibel pa Aruba.
