Directie Informatievoorziening en Automatisering (DIA)

Departamento di Informatica y Automatisacion ta encarga cu maneho di e infrastructura di informacion y comunicacion manera cu ta uz’e den e aparato gubernamental Arubiano. E infrastructura di TIC (Tecnologia di Informacion y Comunicacion) ta basa ariba un cantidad di componente 'state-of-the-art' manera un red masha confiabel cu practicamente ta conecta tur departamento cu otro, posibilidad di comunicacion entre e departamentonan y diferente sistema di computer cu ta asisti diferente departamento den ehecucion di nan trabou diario.

DIA tin un cantidad di empleado talentoso y cualifica cu ta varia di tecnico di computer te specialista den administracion di empresa, den servicio pa por realisa loke ta ariba menciona. Ora di busca empleado pa yena vacatura, DIA ta uza criterio stricto pa seleciona un empleado pa asina garantisa cu su nivel di calidad ta keda manteni. Tur empleado ta labora na e oficina di DIA na Playa, na unda e Servicedesk central tambe ta estableci. E sala di computer ta ubica na un otro sitio ariba e isla.

Fuera cu DIA ta maneha diariamente e rednan di computer y comunicacion cu ta den uzo, e ta envolvi tambe den un cantidad grandi di proyecto cu den mayor of menor medida tin di haber cu TIC. Asina DIA tabata entre otro envolvi cu e desaroyo di e website aki.

DIA semper ta interesa pa haya contacto cu empleadonan potencial. Si tin interes pa sera conoci di mas cerca cu nos, por tuma contacto cu nos pa medio di e adres di E-mail aki riba menciona.