Dia Mundial di Yerba di Lama

Yerba di lama ta matanan of flora submarino cu ta crece den awa na costa den superficienan rond mundo. Nan ta hunga un rol importante den salud di nos oceanonan y ta ofrece varios beneficio, cu ta motibo suficiente pa conserva yerba di lama.

Yerba di lama ta duna cuminda y proteccion na un variedad grandi di bestia di lama, incluyendo pisca, cangreu, turtuga di lama y mamiferonan marino. Nan ta funciona como areanan cu diferente especie ta bay ora cu mester rehabilita y unda piscanan chikito y otro especienan ta sconde pa crece. Yerba di lama ta contribui na salud di e cadena di alimentacion completo. Yerba di lama ta retene carbon den suelo, yudando asina pa reduci e efectonan di cambio climatologico. Un hectar di yerba di lama por retene mes hopi carbon cu un mondi cu matanan grandi. Ademas yerba di lama ta minimalisa e forsa di ola y coriente di lama ora di mal tempo, y asina proteha e costanan contra erosion. Nan ta hunga un rol importante den filtracion di awa y ta reduci posibilidad di awa contamina.
Apesar di nan importancia, yerba di lama ta menasa mundialmente pa actividad humano, manera contaminacion di areanan na costa, desaroyo den lama y na costanan y cambio di clima. Ta calcula cu mas di 30% di e superficie global di yerba di lama a disparce desde 1930.

Dia Mundial di Yerba di Lama ta un ocasion pa eleva e consciencia di hende riba e topiconan cu ta menasa yerba di lama pa asina enfrenta e retonan y tuma accion pa proteha nan. 

Nos tur por aporta na bienestar y proteccion door di:
•    Siña tocante yerba di lama y nan importancia. Comparti informacion cu amigo, famia y colega.
•    Sostene organisacion cu ta traha pa conserva yerba di lama. Haci un donacion of bira un boluntario di un organisacion local of internacional cu ta dedica na proteccion di yerba di lama of algo cu ta relata na esaki manera conservacion di turtuga e.o TurtugAruba.
•    Scoge sostenibel. Reduci bo desperdicio, uza menos awa y sostene negoshi cu ta compromete na proteccion ambiental. Tuma ehempelnan cu e metanan di desaroyo sostenibel ta propaganda. 
•    Educa otronan di e peliger di contaminacion y demasiado desaroyo na nos costanan. Door di conscientisa tocante e impacto di nan escogencia, por contribui na un miho futuro pa e condicionnan di areanan di yerba di lama y nos oceanonan.

Hunto nos por logra cu yerbanan di lama lo sigui florece y ofrece e variedad di beneficio cu nan ta brinda na futuro generacion.