Dia Mundial di ‘Wetlands’: enfoke riba proteccion di wetlands pa futuro
ORANJESTAD - Bida ta prospera den areanan di ‘wetlands’, y hende ta depende di areanan manera wetlands. Den pasado e sitionan aki tabata conoci como bahia, lagoen y/of tambe saliña. Pero mundialmente e convencion di wetlands a delinea kico e sitionan aki ta.
Wetlands ta areanan satura of inunda continuamente, of durante cierto temporada cu awa, y ta un luga di biba of cria pa hopi especie cu ta na peliger of menasa. Aki nan tin un multitud di mata y bestia endemico cu solamente por sobrebibi den e ecosistemanan aki. Ademas wetlands ta yuda proteha contra desasternan natural door di mitiga e impacto di olanan durante tormenta, inundacion y secura.
Wetlands saludabel ta critico pa mitigacion di cambio di clima, adaptacion, biodiversidad y salud humano. Sinembargo, desaroyo cu no ta sostenibel, contaminacion y cambio di clima ta sigui menasa e ecosistemanan aki. Proteccion di e Wetlands ta rekeri colaboracion riba practicanan, regulacion y iniciativanan comunitario cu ta encurasha conservacion efectivo y uzo sostenibel di e ecosistema aki.
Ta celebra Dia Mundial di Wetlands tur aña dia 2 di februari. E conmemoracion ta pa eleva conscientisacion y comprension di e importancia critico di wetlands. Den tur skina di mundo, humanidad ta depende di wetlands pa siglonan – sacando subsistencia, inspiracion y resistencia for di e luganan importante aki.
Den cuadro di esaki, e Convencion di Wetlands a anuncia e tema pa e dia aki cu ta “Proteccion di Wetlands” pa e futuro comun di un y tur. Cada tres aña, representantenan di e gobiernonan di cada un di e Partidonan di Contracto di Convencion di Wetlands ta reuni pa tuma decision riba e conservacion y uzo sostenibel di wetlands y pa yega na acuerdo riba un programa di trabao necesario pa e proximo tres añanan.
Dia Mundial di Wetlands 2025, DNM ta encurasha y invita un y tur pa tuma accion pa yuda conserva e ecosistema importante aki:
- Haci escogencianan consciente pa stop di contamina area di wetland;
- Uni na e esfuerso global pa conserva y maneha wetlands di manera sostenibel;
- Tuma parti na esfuersonan di restauracion di wetlands na Aruba. Esaki por ta colabora cu accionnan di limpiesa na luganan manera Spaans lagoen y of otro saliña y dam cu awa.
Sea parti di e solucion door di haci un esfuerso proactivo y comparti bo storia di conservacion di wetlands un cu otro. Participa hunto cu DNM y otro iniciativanan pa yuda conserva e areanan aki.
