Shete sorto di turtuga di lama ta riba lista di proteccion mundialmente, pero nan ta na peliger di extincion of nan existencia ta menasa pa acto humano of condicion natural causa pa humanidad. Di e 7 sortonan aki, 4 ta bishita nos isla y nos awanan teritorial pa descansa y pa pone webo. E condicionnan aki na Aruba ta faborabel y preferi pa e turtuga di lama. E 4 sorto di turtuga di lama cu ta frecuenta Aruba ta; e Caret (Eretmochelys imbricata), Cawama (Caretta caretta), Turtuga Berde (Chelonian mydas) y e Drikil (Dermochelys coriacea).

Esun cu ta mas na peliger ta e Kemp’s ridley sea turtle (Lepidochelys kempii).

E menasa mas grandi pa turtuga di lama ta:

• Poaching: ta mata turtuga ilegalmente pa nan carni, webo of casca pa benta of consume;
• perdida di habitat: Turtuga di lama mester di santo blanco di e beachnan pa pone nan neishi, pa ora e yiunan nace, nan por sali bin ariba facilmente. Desaroyo cu mas edificio na e costanan ta destrui nan habitat. Tambe e luznan di e edificionan den cercania di beach ta desorienta turtuga di lama. Esaki ta pone cu e bestia ta bay otro rumbo unda no ta lama, cu ta forma peliger pa nan bida;
• captura accidentalmente (bycatch): turtuga di lama ta pega den reda cu ta destina pa gara pisca y tambe den canasta;
• polucion di plastic: Turtuga di lama ta confundi saco di plastic pa jellyfish, nan cuminda principal. Esaki ta causa blokeo di nan sistema digestivo y por resulta fatal;
• cambio di clima: e nivel di lama ta subi y ta causa cu e neishinan ta inunda riba beach. E cambio di clima ta cambia e temperatura di lama cu ta causa cambio den e sexo di e yiunan di turtuga, causando desbalansa.

Kico tur nos por haci pa yuda cu proteccion di e turtuga di lama?

• Aporta y sostene organisacionnan cu meta di conservacion di turtuga di lama, manera e Turtuga Aruba. Por haci donacion na e fundacion of por aporta door di bira miembro voluntario;
• reduci consumo di plastic y su impacto: Ora di bishita beach, uza producto re-uzabel y preveni producto di plastic di un solo uzo. Ta prohibi uzo di producto solar cu oxybenzone cu ta afecta coral y ecosistema marino cu ta fuente di cuminda pa e turtuga;
• sea responsabel ora di navega boto di placer: Mester ta cauteloso pa turtuga di lama;
• raporta presencia di turtuga di lama riba nos costa na Fundacion Turtuga Aruba; Si mira un turtuga di lama subi tera of nota rastro di turtuga, notifica Turtuga Aruba na 592-9393.  No stroba of mishi cu e turtuga di lama. No saca potret cu flash cu ta desorienta e turtuga. Turtuga Aruba ta monitor e actividadnan di turtuga di lama na Aruba y ta comparti e datonan cu DNM;
• si bo ta snorkel of bucea y kier saca potret, haci esaki riba un distancia y no acerca e turtuga como cu esaki ta contra ley;
• scoge pa cuminda di lama cu ta sostenibel: opta pa cuminda cultiva na un manera sostenibel y cu ta den margen di ley;
• boga pa proteccion di turtuga di lama y nan habitat.
• siña otro tocante di turtuga di lama y nan balor.