Dia Mundial di Ozon 2024: Avansando Accion pa Clima

Pa logra e obhetivo aki, ta importante pa stop e produccion y uzo di productonan cu ta haci daño severo na e Capa di Ozon.

E tema pa World Ozone Day (WOD) 2024 ta e Avanse di e Accionnan pa Clima, estableci den e Protocol di Montreal. E tema ta subraya e rol crucial cu e Protocol di Montreal tin y no solamente pa cu e restauracion di capa di ozon sino tambe den mitiga cambio di clima. Esaki ta pa recorda nos di e responsabilidad colectivo pa sigui intensifica e esfuersonan pa combati cambio climatico.

E capa di ozon, ta un capa fragil den stratosfeer cu ta proteha e mundo contra e radiacion dañino ultravioleta di rayonan di solo, asina yuda preserva bida riba e planeta. E eliminacion di uzo di substancianan kimico cu ta caba cu e capa di ozon ta yuda proteha esaki pa futuro generacionnan. Haciendo esaki, nos por papia di reduccion di emisionnan directo y indirecto di gasnan cu ta keinta nos planeta. Cual ta contribui na e metanan pa accion pa clima, y construi un futuro sostenibel pa un y tur.

E obhetivo final ta pa elimina e substancianan e base di desaroyo di conocemento cientifico y informacion tecnologico. Ta trata di varios grupo di substancia cu ta caba cu e ozon. E grupo di substancia kimico ta clasifica den un lista den anexo den e Protocol di Montreal. E Protocol ta exigi control di casi 100 substancia kimico, den varios categoria. Cada grupo den e anexo di substancia kimico, e Tratado tin un cronograma estableci pa e eliminacion di produccion y e consumo di e substancia ey, cu e meta pa eventualmente elimina esaki completamente.

WOD ta ofrece oportunidad pa reflexiona riba e logronan di pasado, e trabounan actual, y futuro implementacion di e Protocol di Montreal y e amienda di Kigali. E celebracion aki ta un actividad anual pa eleva conscientisacion di comunidad tocante e importancia di e acuerdo ambiental multilateral aki. Por considera e dia aki, un oportunidad pa involucra publico den conoce “kico ta encera e Protocol di Montreal y asina encurasha dialogo den termino largo”.

Hunto nos ta logra e avancenan, y ta danki na e trabou colectivo di Nacionnan Uni (UN), secretariado cu ta atende cu e tema di Ozon, gobiernonan, industrianan y sociedad civil a yega asina leu cu e capa solar ta den un bon estado, pero mester sigui proteh’e!