Dia Mundial di Cancer: Un yamada pa accion y conscientisacion
ORANJESTAD - Tur aña riba 4 di februari, mundo nos ta observa Dia Mundial di Cancer, un dia dedica na conscientisa y informa comunidad riba prevencion, detecion tempran, y tratamento di cancer.
Pa e ocasion aki Departamento di Salud Publico di Aruba (DVG) ta enfatisa riba un punto crucial: e impacto dañino cu consumo di alcohol tin y su fuerte relacion cu cancer!
Alcohol ta un factor importante cu ta contribui na desaroyo di varios tipo di cancer. E Organisacion Mundial di Salud (WHO) na 2019 a reporta cu 4.4% di e total di diagnostico di cancer y tambe 401,000 morto debi na cancer tawata tin un relacion directo cu consumo di alcohol. Alcohol y cancer tin un conexion serio. Alcohol por causa cancer den diferente parte di bo curpa incluyendo; boca, garganta, larynx, higra, pecho, tripa y rectum. No tin un nivel sigur di consumo di alcohol pa evita cancer. Cada bebida ta conta y e riesgo ta cuminsa desde e prome bebida y ta aumenta segun ta bebe mas. E uzo di alcohol excesivamente, ta aumenta e riesgo te hasta 30 bes mas halto y si acaso ta huma tambe, e riesgo ta aumenta drasticamente.
Estadistica di Cancer na Aruba
Entre 2011 y 2021 DVG a reporta cu e tipo di cancer cu mas ta causa mortalidad na Aruba ta:
- Cancer di pulmon;
- Cancer di luchtpijp (trachea);
- Cancer di pecho;
- Cancer di tripa y rectum.
Total 740 persona a fayece na Aruba durante e periodo di 2011 pa 2021 pa motibo di cancer.
Segun investigacion mundial, entre 30% y 50% di morto di cancer ta prevenibel si evita cierto factornan di riesgo manera entre otro consumo di alcohol. Deteccion tempran y tratamiento adecuado tambe ta reduci e impacto di cancer.
Pa reduci e posibilidad di desaroya cancer, DVG ta recomenda:
- No huma of vape;
- Mantene un peso saludabel;
- Come saludabel, incluyendo fruta y berdura;
- Haci ehercicio regularmente;
- Limita consumo di alcohol na consumo poco frecuente;
- Uza proteccion durante relacion sexual;
- Vacuna contra hepatitis B y HPV;
- Uza sunblock regularmente pa evita exposicion na rayonan di solo;
Pa mas informacion like Directie Volksgezondheid Aruba riba Facebook, follow directie_volksgezondheid_aruba riba Instagram, bishita www.dvg.aw, yama 5224200 of mail nos na servicio@dvg.aw.
