Dia mundial di Abeha 2024: Conecta hobennan cu e tema di apicultura y conservacion di polinisadonan manera abeha.

E dia aki ta un dia observa pa Nacionnan Uni (UN) unda ta reconoce e importancia di conscientisa tocante e menasa cu abehanan ta encontra y reconoce nan aporte na un desaroyo sostenibel. 

E tema pa aña 2024 ta "Hubentud, conecta cu Abeha" (Bee Engaged with Youth). E tema ta pone enfasis riba e importancia pa involve e hobennan pa asina nan sinti 

Actualmente abehanan y otro polinisadonan ta enfrenta hopi reto, incluyendo perdida di habitat, uzo di pesticida, y cambio climatico. 

Nos hobennan por yuda conserva e poblacion di abeha y otro polinisadonan na varios manera:

• Siña mas tocante abehanan: Lesa diferente buki y pagina web pa siña mas tocante e ciclo di bida di abehanan, e rol cu nan ta hunga den e ecosistema, produccion di cuminda y e retonan cu nan ta enfrenta. Abehanan ta polinisadonan pa produccion di fruta, berdura y matanan cu ta floria.
• Planta matanan local: scoge pa planta matanan local/nativo cu ta aporta na e fuente di cuminda importante di e abehanan. E matanan cu ta crece na Aruba cu ta atrae abeha ta: watapana, coco, palo di boonchi, boonchi strena, seida, dama di anochi y tambe mat’i brazil. Inclui un variedad di matanan cu ta floria diferente temporada di aña.
• Yuda cu proyecto di conservacion: Organisacionnan local of productornan local manera Aruba Bee Haven ta organisa proyectonan pa yuda conscientisa riba topico di abehanan. Por haci un tour cerca productornan di honing y nan practica di apicultura. Riba bo mes por busca informacion riba internet, puntra un mayor of na scol pa yuda busca proyectonan di produccion y cuido di abeha.
• Comparti bo conocemento: Ora bo siña algo nobo tocante abehanan, comparti esaki cu bo famia y amigonan Envolvimento di scolnan den apiturismo y apicultura no solamente ta hisa interes di muchanan den naturalesa pero tambe ta promove un estilo di bida saludabel y ta eleva e consciencia medio ambiental.

Envolvimento di hobennan den cuido di abeha y den apicultura tin beneficionnan pa hobennan den futuro. 

Aki ta algun punto di atencion. 

• Door di conscientemente selecta productonan a base di nan origen of caracteristica, ta aporta na e causa di proteccion di e medio ambiente. Hobennan mester tene na cuenta cu nan accionnan. Esakinan mester ta den harmonia cu abehanan y otro polinisadonan (Bee-friendly products).
•  Apicultura ta ofrece hobennan acceso na oportunidadnan di entrada cu ta rekeri tiki pa cuminsa cu cultivo/ cuido di abeha y uzando materialnan cu ta na nan alcanse. 
• 'Beekeeping' ta empodera hobennan y ta brinda mas forsa economico. Encurashando 'entrepreneurship' den areanan den centro y pafo di centro. 
• E traspaso di enseñansa di un generacion pa otro y e intercambio di conocemento di cuido di abeha ta yuda cera e bashi entre un imker experiencia y un imker nobato. 
• Invertiendo den iniciativanan guia pa hobennan den cultivacion di abeha ta acelera innovacion, creatividad y avance den tecnologia cu ta atende cu e retonan cu e populacion di abeha ta encontra.

DNM ta recorda un y tur pa preveni uzo di kimico cu ta causa daño na abeha y nan colonia. Reduci of cambia e uzo di pesticida of fertilisante, scoge pa opcionnan organico sostenibel. Bon practicanan di cuida abeha ta contribui na salubridad humano, di abeha y di medio ambiente. Bon practica ta permiti cuidadonan di abeha mehora productividad, haci ganashi, y ta sostenibel den nan negoshi mientras nan ta contribui na un desaroyo sostenibel, resiliente y competitivo den e sector aki. 

Feliz Dia Mundial di Abeha 2024!