Dia Internacional di Cero Desperdicio 2025: Ban Traha Hunto pa un Aruba Sostenibel!

E programa di Nacionnan Uni pa Medio Ambiente (UNEP) y UN-Habitat ta uni forsa pa enfoca riba e importancia pa mehora maneho di desperdicio mundialmente y promove habito di consumo y produccion sostenibel pa combati e crisis di polucion di desperdicio. Aki na Aruba no ta diferente, desde aña pasa cu a cera dump Parkietenbos a bin ta traha riba e manera sostenibel pa cu desperdicio, esaki ta uno cu ta manda diferente clase di sushi pa diferente localidad (canalnan) na unda esaki por haya otro posibilidad pa recicla, exporta of reuza den produccion di otro producto.

Cada aña, humanidad ta genera entre 2.1 y 2.3 biyon ton di desperdicio solido den un municipio. Sin accion urgente, e generacion anual di desperdicio lo yega 3.8 biyon ton na aña 2050. Polucion di desperdicio ta menasa salud humano, ta costa economia mundial varios biyon di dolar tur aña, y ta aumenta e crisis planetario actual (triple planetary crisis): cambio di clima, perdida di naturalesa (tera y biodiversidad) y polucion y desperdicio.

E tema "Rumbo pa Cero Desperdicio den Moda y Textiel," ta enfoca riba e necesidad urgente pa tuma accion pa reduci e impacto di desperdicio di e sector di moda y textiel, y promove sostenibilidad y  economia circular. Entre 2000 y 2015, produccion di paña a duplica. Sinembargo, ta calcula cu ta genera 92 miyon ton di desperdicio textiel mundialmente tur aña. Esaki ta ekivalente na un truck yen di paña cu ta kima of manda riba un ‘landfill’ cada seconde. E aumento rapido den produccion y consumo den e sector textiel ta causa problema ambiental, economico y social. E ultimo aki ta mas bisto den e partinan zuid di mundo.

Con Aruba por combati e problema di desperdicio? 

Aruba, aunke ta un isla chikito, ta enfrenta retonan unico den maneho di desperdicio. Nos mester adopta un enfoke di cero desperdicio pa proteha nos medio ambiente y mantene nos isla su naturalesa saludabel y bunita. 

Aki tin algun sugerencia: 

• Reduci, reuza, recicla: Promove e 3R-nan aki den tur aspecto di bida;
• Moda sostenibel: Evita "fast fashion" y inverti den paña duradero y di calidad;
• Apoya negoshinan local: duna preferencia na negoshinan cu ta practica sostenibilidad;
• Recicla textiel: Establece puntonan di reciclahe pa paña y textiel;
• Educa y conscientisa: Informa comunidad tocante e impacto di desperdicio y con pa biba mas sostenibel;
• Politica gubernamental: Implementa leynan pa regula produccion y consumo di textiel, y incentiva negoshinan cu ta adopta practicanan sostenibel;
• Responsabilidad di negoshi: cumpra for di negioshinan cu ta sostene skema di EPR pa responsabilisa productornan pa e ciclo di bida completo di nan productonan. Of cu tin un parti di nan entrada cu ta bay na un aporte “environmental corporate responsability”. 

Kico bo por haci tocante bo consumo di producto di textiel? 

• Cumpra paña di calidad y cu ta duradero;
• Reusa y drecha paña cu a kibra; cambia un zipper, corta un jeans na short;
• Cumpra paña "second hand";
• Recicla paña y textiel;
• Evita cumpra for di ‘fast fashion’manera Shein etc.;
• Apoya marca di paña cu ta sostenibel. 

Yamada pa tuma accion: 

DNM conhuntamente cu e yamada internacional di organisacionnan manera UNEP y UN-Habitat ta haci apelacion na tur stakeholder, gobierno, sociedad civil, negoshi, academia, comunidad, hende muhe y hoben, pa participa den iniciativanan di cero desperdicio internacional, regional y local. Pa mas informacion, bishita: https://www.un.org/en/observances/zero-waste-day    

Ban traha hunto pa un Aruba limpi, berde y sostenibel!