Desaroyo di sector di FINTECH entre Aruba-UN ECLAC
ORANJESTAD - Dia 7 di februari 2025, Minister demisionario di Asunto Economico, Comunicacion y Desaroyo Sostenibel Geoffrey Wever, a reuni cu un delegacion di “United Nations Economic Commission for Latin America and the Caribbean” (UN ECLAC) den cuadro di ehecucion di un estudio riba e diferente riesgo, obstaculo y oportunidad di e sector di FINTECH y evaluacion di e impacto di “Blockchain Technology” y “Crypto Currency”.
Ta premira pa ricibi e resultado den luna di april proximo cu lo forma e base pa implementacion di maneho pa pusha e desaroyo di e sector FINTECH y diversifica Aruba su economia.
FINTECH - of Tecnologia Financiero — ta referi na tecnologia innovativo y solucionnan digital cu ta aplica den e sector financiero pa haci servicionan financiero mas eficiente, accesibel, sigur y facil pa uza.
Den e siman di 3 pa 7 di februari e delegacion di UN ECLAC a reuni cu diferente partner manera Banco Central di Aruba, Camara di Comercio, ATIA, Setar N.V., Cybersecurity Center of Excellence, Insurance Association of Aruba, Aruba Bankers Association, Digicel, Directie Telecommunicatie Zaken, Qredits Aruba, Gamma IT y diferente persona clave den e sector di FINTECH.
Meta di e reunion aki tawata pa haya un bista realistico di e posicion actual di Aruba den e sector FINTECH pa asina tin mas conocemento di e impacto economico di tecnologia innovativo y solucionnan digital nobo den e mundo comercial impacta pa cambio y desaroyo continuo. Esaki ta un proyecto cu a inicia mas cu un aña pasa y ta den desaroyo.