E departamento social tin e siguiente tareanan:

• Ta haci investigacion a base di e kehonan cu ta drenta. Esaki ta ensera entre otro cu ta haci bishita na cas, ta tene combersacion cu famia y e persona concerni etc.;
• Ta percura pa medidanan di proteccion di mucha ora cu ta constata cu decadencia moral y/of fisico por ta un menasa pa e menor;
• Ta interveni den situacion di crisis unda un menor ta envolvi;
• Ora ta mustra cu e situacion na cas no ta adecuado pa e menor, e ora ei por traslada e menor pa un miembro di famia, famia di criansa of pa un internado;
• Ta raporta na Corte y/of Ministerio Publico;
• Ta regla asunto di voogd pa menor;
• Mantene contacto cu e menor, mayor y famia (di criansa), internado, scol y otro instancia di ayudo cu miras riba e progreso di e yudansa/asistencia;
• Guia di e menor, mayor, y famia (di criansa). Por pensa aki riba problema matrimonial, areglo di bishita, problema di conducta etc.;
• Haci investigacion y raporta na hues tocante tur peticion pa adopcion;
• Duna guia psicologico;
• Suministra declaracionnan di autoridad di mayor/voogdij;
• Suministra declaracion necesario pa haya kindertoelage(placa pa yiu). Solamente empleado publico, semi-empleado publico of funcionarionan di un instancia subsidia door di gobierno por bin na remarke pa esaki.

Tin orario di consulta pa asisti publico cu tur pregunta y/of kehonan. E dianan y oranan cu tin consulta ta:

• dialuna di 2:00 or te cu 4:00 or di atardi;
• diaranson di 8:00 or te cu 11:00 or di mainta.

Cliente por pasa libremente of yama pa haci un cita. E funcionarionan di e Departamento Social ta disponibel 24 ora pa dia pa situacion di crisis. Si ta un caso di crisis fuera di orario di oficina, e cliente mester tuma contacto cu Polis via e number di telefon 100. Na su turno Polis ta pidi ayudo di Voogdijraad mesora.