Departamento di Legislacion y Asunto Huridico (DWJZ)

Vision

E Departamento di Legislacion y Asunto Huridico (Directie Wetgeving en Juridische Zaken) ta suministra claridad den e mundo compleho huridico pa Pais Aruba.

Mision

E Departamento di Legislacion y Asunto Huridico (DWJZ) ta promove un gobernacion adecua, eficiente y husto door di duna conseho cla y transparente, defensa di interes y reglamentacion. DWJZ ta traha hunto cu otro ministerionan pa un evaluacion y comparacion husto di e derecho y e obligacion di gobierno y di e ciudadano. Nos meta central ta pa duna servicio y productonan na nos clientela: individuo, organisacion y companianan. Nos cliente ta central, tanto den nos manera di traha como e forma con nos organisacion ta hinca den otro. Nos ta traha pa resultado, nos ta consciente di e gastonan y ta trata nos clientenan na un manera amabel, habri y cu dedicacion.

E Departamento di Legislacion y Asunto Huridico ta sostene y facilita e diferente departamentonan den elaboracion di nan producto y servicionan. Ademas e gerencia tin un funcion di control y investigativo ora cu ta trata di asunto cu ta concerni gobierno. E ta vigila e posicion huridico di e organisacion completo y ta practicamente “e consenshi huridico”. Den casonan cu sa presenta e gerencia por duna conseho, sea pidi of no pa loke ta trata e proceso huridico y e consecuencianan cu por resulta for di esaki. Di un banda nos tin un rol pa evalua y controla den e marco di ley y di otro banda nos ta duna conseho y apoyo na momento di ehecucion di un ley.

Meta

E Departamento di Legislacion y Asunto Huridico (Directie Wetgeving en Juridische Zaken) tin como meta promove un maneho adecua, eficaz y husto di e organonan di estado y evalua e derecho y debernan di gobierno y e cuidadano den cooperacion estrecho cu otro ministerio.

Tareanan:

E Departamento di Legislacion y Asunto Huridico (DWJZ) ta aspira pa realisa su meta door di ehecuta e siguiente tareanan:

•  Traha tur reglamento necesario, cu ta forma parti di e tarea di DWJZ;
• Publica tur reglamento den e Gazeta Oficial (afkondigingsblad) y e landscourant (Gazeta di Pais Aruba) y e trabounan corespondiente cu esey;
• Studia y analisa e desaroyonan huridico y politico di asuntonan di Reino y asuntonan constitucional;
• Prepara conseho, documentonan di maneho y investigacion riba e tereno aki;
• Atende asuntonan di derecho administrativo (di gobierno) pa tur ministerio;
• Atende asuntonan relaciona cu derecho di estado, derecho civil, derecho comercial y derecho penal, demanda (accion) hudicial civil y demanda penal;
• Traha, riba peticion of no consehonan huridico y di maneho pa ministerionan cu ta relaciona cu derecho di estado, derecho civil, derecho comercial, demanda (accion) hudicial civil y demanda penal;
• Traha, riba peticion of no, conseho huridico y di maneho pa minister di Husticia relaciona cu temanan riba tereno di orden publico y seguridad; organisacion di hurisprudencia, derecho di persona huridico, nacionalidad, admision y expulsion, aplicacion di legislacion penal y legislacion particular realisa bou di e responsabilidad di e minister di Husticia;
• Traha, riba peticion of no, consehonan huridico y di maneho pa ministerionan tocante dunamento, prolongacion, revocacion di permiso, autorisacion y dispensacion;
• Fungi como abogado di Pais Aruba den e Corte di Prome Instancia, den Corte Comun di Husticia, duna conseho -riba peticion of no- tocante tur caso administrativo y huridico, representa Pais Aruba y su organonan gubernamental den tur procedura cu ta regarda LAR;
• Publica anuncio oficial di gobierno cu ta legalmente obligatorio tocante di permiso y otro asunto parecido.