Departamento di Enseñansa Aruba (DEA), den consulta cu e directivanan di scol, na november 2023, inicia cu un trayecto di preparacion pa cabesante- y maestronan di klas 1 di scol basico. E promer sesion informativo a cuminsa dia 17 di november 2023 na unda a comparti informacion, conecta cu otro y crea diferente Comunidad Profesional di Siñamento (CPS). En total a forma ocho CPS na unda cada un lo por a enfoca riba un of mas topico di interes specifico di e nucleo di e CPS. 

E cabesante- y maestronan di klas 1 a bin hunto dia 19 di januari, 16 di februari, 27 di maart, 19 di april y 31 di mei 2024, y hunto a prepara debidamente pa e introduccion di siña lesa y skirbi na Papiamento den klas 1 entrante aña escolar 2024-2025. Cada dia di estudio a tuma luga bou guia di DEA conhuntamente cu Centro di Desaroyo Profesional Continuo (CDPC) di Instituto Pedagogico Arubano (IPA).  

Cada reunion a cuminsa cu un momento general unda a comparti informacion general pa esnan presente, sigui pa tayernan informativo pa e maestronan di klas 1 y pa finalisa e dia a sigui traha riba e topico di e CPS. Cabesantenan a participa na tayernan dirigi specificamente pa nan, na unda a comparti informacion y sosten pa  asina apoya nan den nan papel pa sostene y motiva e maestronan y e team di nan scol. 

Cada CPS a presenta nan producto final na nan coleganan y directiva di scol durante e ultimo dia di estudio riba 31 di mei. Di e manera aki e gruponan colectivamente a yuda sostene otro den e preparacion di e implementacion di e maneho nobo di idioma na unda ta siña lesa y skribi na Papiamento. A profundisa nan mes den e materia na unda algun grupo a presenta nan observacion nan, otro a presenta material cu nan a adapta, y otro a traha material completamente nobo. Di e manera aki e gruponan a acopla tur cos na otro.  

DEA ta gradici tur cabesante- y maestronan y directiva di e scolnan cu a forma parti di e preparacionnan pa e introduccion di alfabetisacion di Papiamento pa e aña escolar 2024-2025.

Pa mas informacion di enseñansa na Aruba por bishita www.ea.aw, sigui DEA riba Facebook y Instagram @educationaruba.