Departamento di Enseñansa Aruba cu prome encuentro di Alfabetisacion na Papiamento pa aña escolar 2024-2025

Aki a cuminsa cu e trayecto di preparacion di e maestronan di klas 2. E trayecto di preparacion ta consisti di 6 encuentro pa ekipa e maestronan debidamente pa sigui cu e implementacion di e maneho nobo den klas 2.  
Varios estudio mundialmente ta indica cu ora un mucha haya educacion den su propio idioma, e por expresa su mes miho y cu esaki lo tin impacto positivo ariba nan experiencia academico. Durante di un recien bishita na varios scol basico, Minister di Enseñansa y Deporte Endy Croes, por a experencia un diferencia positivo den cual e alumnonan ta mucho mas activo durante les. 

Na 2009 a inicia cu e proyecto piloto Scol Multilingual (PSML) na Colegio San Hose y Colegio Conrado Coronel. For di aki PSML a traha un plan di implementacion pa e metanan nucleo di Enseñansa Primario cu a yama e plan Scol Arubano Multilingual (SAM). A base di e data y experiencia colecta durante e periodo 2009-2024 y e maneho integral di idioma den enseñansa, gobierno a dicidi pa start cu e metanan nucleo di Papiamento y Hulandes. Esaki ta e implementacion di siña lesa y skirbi na Papiamento y Hulandes duna den un forma cu ta pas cu e contexto di Aruba.

E maestronan di e dos scolnan piloto (PSML) tambe tabata presente pa duna sosten na e maestronan di klas 2 cu lo inicia cu e trayecto di preparacion. Por ultimo DEA a duna un splicacion tocante e plan di prepracion, professionalisacion y guia cu lo ofrece e maestronan di klas 2.  

Linguista dr. Joyce Pereira, kende semper a boga pa e balor di nos idioma Papiamento y su importancia den Enseñansa na Aruba, a duna un presentacion titula: “E importancia di Papiamento pa desaroyo general di e mucha biba na Aruba”. Un raport di UNESCO ta enfatisa cu mucha mester haya enseñansa den e idioma cu e ta compronde, uza un idioma cu e mucha no ta tende pafo di scol ta stroba e mucha su siñamento y cu por lo menos 6 aña di enseñansa den idioma materno ta importante.  
Segun Dr. Pereira, basa riba documento y estudio di UNESCO, nos enseñansa no ta autentico y no ta basa riba necesidad of realidad di Aruba. Alabes el a trece padilanti cu nos enseñansa no ta dirigi riba nos alumnonan y ta contra derecho di mucha.  
Dr. Pereira a papia tocante e importancia di idioma materno y cu idioma ta e aspecto di mas importante cu ta determina nos como hende; niun idioma no ta miho, mas bunita of mas importante cu otro. Pa cada pueblo su idioma ta un tesoro bibo masha grandi y cu ta via su idioma un pueblo ta pasa conocemento, historia y cultura di un generacion pa otro y si un idioma muri, ta henter un cultura, historia y herencia ta bay perdi.  

A finalisa e promer encuentro cu ehercicio activo na unda e maestronan a conecta cu otro y a crea diferente Comunidad Professional di Siñamento (CPS). Cada CPS ta enfoca riba diferente area specifico cu ta di importancia pa su participantenan. En total a forma cinco CPS. Durante e encuentronan venidero lo sigui traha den CPS pa prepara pa asina sigui cu e implementacion di siña lesa y scirbi na Papiamento den klas 2. 

E siguiente encuentronan di preparacion mensual lo tuma luga dia 14 di october 2024, 25 di november 2024, 27 di januari 2025, 31 di maart 2025 y 19 di mei 2025. Cada encuentro lo tuma luga bou guia di DEA den coperacion estrecho cu Centro di Desaroyo Profesional Continuo (CDPC) di Instituto Pedagogico Arubano (IPA).

DEA ta gradici e diferente facilitadornan di Dienst Publike Scholen (DPS), Stichting Katholiek Onderwijs Aruba (SKOA) y CDPC pa nan aporte na e proceso di e promer encuentro pa e aña escolar aki y alabes ta yama danki na tur esnan cu di un manera of otro a duna sosten na e encuentro.  

Pa mas informacion relaciona cu enseñansa na Aruba por acudi na www.ea.aw.  Tambe por sigui nos den social media via nos facebook y instagram pages @educationaruba.