Departamento di Aviacion Civil (DLA)

Hunto cu Hulanda y Antias Hulandes, Aruba ta forma parti di Reino Hulandes y pa e motibo ey ta comparti e miembrecia conhunto di ICAO. Na aña 1986 Aruba a haya Status Aparte dentro di Reino y na mesun tempo a institui Direccion di Aviacion Civil di Aruba.

Prome a tuma over e leynan di aviacion di Antias Hulandes y a ratifica nan y a sincronisa cu e leynan Hulandes di aviacion. Na aña 1995 a haci cambionan grandi den e leynan pa por a cumpli cu e nivel di ‘Joint Aviation Requirements’ Europeo nobo (JAR-OPS, JAR-FCL, etc). Door di a cumpli cu esakinan, Aruba a logra score halto den US DOT (FAA) audit y Aruba a haya un categoria 1 di IASA!

E esfuerzo grandi aki a percura pa un cultura di seguridad profundo cerca diferente instancia di aviacion na Aruba. Autoridad di aviacion y e industria local di aviacion ta dirigi nan mes ariba logra y traha cu e standardnan di mas halto.
A dedica hopi tempo y a haci investigacion, teniendo cuenta cu e grandura di e isla y e demandanan cu ta cambiando, pa cumpli cu e demandanan halto aki como tambe pa e promocion continuo di e industria di aviacion na Aruba.
Un ehempel di esaki ta, e acuerdo cu a cera cu un otro Autoridad di Aviacion Civil pa comparti experticio.