Dande
Cu aña nobo ta un tradicion na Aruba cu grupo di Dande ta pasa di cas pa cas pa canta dande y asina desea e famia, conoci y amigo nan miho deseo di pas, felicidad y prosperidad pa aña nobo cu “Ay Nobe”. E coro ta ripiti e refrein Ay Nobe (Aña nobo) den e melodia alegre. E instrumentonan musical cu ta uza ta cuarta, guitara, acordeon of viool, wiri y tambu. Como aprecio cada persona cu e grupo di Dande canta ta hinca un suma di placa den e sombre di e cantado di Dande.
Dande ta un sorto di serenata dedica na cada miembro di famia cu e miho deseonan pa e aña nobo. Ademas Dande ta e musica mas representativo y simbolico di musica local, di mesun manera cu calypso ta pa Trinidad y reggae ta pa Jamaica, cu pa medio di su musica ta refleha e balor etnico di e pueblo. Dande tambe tin un ritmo Africano, mescos cu tumba of e tambu di Curaçao. Algun districto tin awor varios grupo di Dande. Te cu Tres Rey e gruponan di Dande ta pasa di cas pa cas pa canta nan cantica tradicional. Desde 1971 ta organisa cada aña un festival di dande pa eligi e rey of reina di Dande. Tambe tin un festival di dande pa mucha y hoben pa mantene e tradicion di Dande bibo.