Cuerpo Policial di Aruba a ricibi nan vehiculonan nobo
ORANJESTAD - Diamars merdia, conhuntamente cu altocomisario di Polis drs. Ramon Arnhem y gerencia di Cuerpo Policial di Aruba, Minister di Husticia y Asuntonan Social sr. Rocco Tjon a haci entrega di e vehiculonan nobo pa Cuerpo Policial.
Cu su autonan nobo, awor KPA su patruya policial ta cla pa sigui patrulla. Un cambio grandi na e vehiculo policial pa locual ta trata e marca y modelo pero tambe tecnologia avansa usando e ultimo modelo nobo di marca “Whelen”. A haci un cambio radical for di e zwaailicht blauw y oraño pa blauw y cora. E cambio aki tabata ta pa miho visibilidad y seguridad pa e agentenan policial pero tambe pa comunidad. Tambe lo tin sonido di sirena diferente compara cu antes pa mihor sonido.
Como fuera e flota nobo aki tambe lo ricibi “Data Terminals” pa asina e agentenan por ta mihor equipa den nan patruya policial cu informacion. Di e forma aki Aruba ta dal un stap grandi locual ta tecnologia y husticia.
“Inverti den nos hendenan, tecnologia y material y crea un sentido di seguridad pa nos comunidad y nos agentennan. Cuerpo Policial Aruba ta den desaroyo positivo pa asina crea un base solido pa e futuro di KPA”. Tabata palabranan di altocomisario Arnhem hopi satisfecho cu otro logro mas pa bienestar di KPA y e seguridad di Pais Aruba.