Despues di un proceso intensivo di identificacion y documentacion di edificionan y sitionan cu tin balor unico pa humanidad, Monumentenbureau ta percura pa nan mantencion y restauracion, y ta promove pa proteha y preserva e monumentonan como herencia cultural di Aruba. Ademas Monumentenfonds Aruba ta activo cu su meta principal pa busca fondo pa por financia e mantencion y restauracion di e monumentonan. Aruba ta conta cu un Monumentenraad cu ta evalua y duna aprobacion necesario ora ta haci mantencion y restauracion.

Maria Convent 

E edificio di Maria Klooster conoci como Maria Convent ta data di 1920 na unda e soeurnan di Dominicanessen di Voorschoten tabata hospeda. E kapel di e klooster a ser agrega na 1946. Despues cu e klooster a cera na 1980, a entrega e edificio na Gobierno di Aruba. Na 1995 a cuminsa e trabou di renovacion y na 1996 e Ministerio di Cultura y Departamento di Asuntonan di Exterior a muda pa e edificio aki. E edificio a conoce un renovacion y awe e facultad di ‘Sustainable Island Solutions through Science, Technology and Mathematics’ (SISSTEM) di Universidad di Aruba, ta ubica den Maria Convent. Esaki ta e di dos fase di e proyecto di SISSTEM cu ta financia cu fondonan di Union Europeo hunto cu e yudansa di United Nations Development Program (UNDP). Esaki lo yuda forma studiante cu e conocemento pa logra un desaroyo sostenibel.

Warda di Polis Savaneta

E monumento conoci como Warda di Polis Savaneta tambe ta den restauracion y lo bolbe sirbi como oficina pa Cuerpo Policial di Aruba. A traha e edificio aki den añanan 30 pareu cu e 'Politiepost' nan di Oranjestad, San Nicolaas y Noord.

Cas Veneranda

Den centro di cuidad ta tumando luga e renobacion di Cas Veneranda cu ta den proceso pa bira momumento oficial di Aruba. Na 1936 sr. Merdado ‘Dada’ Picus a construi e edificio aki riba instruccion di sr. Federico Maximiliano ‘Machi’ Arends pa su casa sra. Maria Veneranda. E arkitecto Dada a bay Cartagena, Colombia pa wak un cas estilo neobaroco di Latino America cu e casa di sr. Machi Arends tabata gusta pa construi Cas Veneranda den mesun estilo. Cas Veneranda a conoce hopi funcion, e tabata cas di famia Arends, despues e tabata tambe un luga cu tabata bende ijscream.  Machi tabata comerciante y consul di Spaña y asina e cas aki tambe a fungi como oficina di consulado di Spaña. Despues di algun tempo Cas Veneranda a bira un discoteque “Club Noveau” y na aña 1978 dos comerciante a habri Papiamento Restaurant den e edificio aki. Algun tempo despues e restaurant a muda y e edificio a keda bashi. Na 2014 un candela grandi a destrui gran parti di e edificio.
Na momento cu termina e restauracion di e edificio aki, Departamento Economico di Gobierno di Aruba lo ocupa esaki.

Ex edificio di DOW

E edificio aki a wordo diseña pa DOW na aña 1949 den un estilo nobo di arkitectura comercial (DOW Architectuur) pa por ubica e oficinanan di DOW aden. Durante e temporada ey cu establecimento di Lago, economia di Aruba a crece y consecuentemente e trabounan administrativo y e trabounan na DOW tambe a aumenta. Esey a trece cune cu DOW mester a muda pa bay un edificio mas grandi y moderno. E contratista Ramon Montaner a construi e edificio ake den dos fase. Prome a construi e parti banda pazuid (L. G. Smith Blvd) y na 1954 a construi e parti ubica na Paardenbaaistraat. Un caracteristica notabel di e arkitectura entre 1930 y 1950 tabata cu e daknan di panchi di ceramica tabata sali for di e gevel di e edificio. Debi na di scarsedad di material di construccion door di Segundo Guera Mundial e daknan tabata cubri cu panchi di metal, eterniet y asfalt. E edificionan construi durante e periodo aki tabata construi teniendo cuenta cu clima. E fachada ta traha pa laga luz y aire pasa, proteha riba e calor di e solo pa controla e clima paden di e edificio. Recientemente e edificio di Ex-DOW a keda traspasa pa su doño nobo, Aruba Ports Authority cu lo percura pa renoba e edificio monumental aki pa e por bira oficina pa APA, ATA y Monumentenbureau. Un parti di e monumento lo bira un 'Visitor Information Center' super moderno cu lo brinda informacion na nos turistanan.