Costo di cuido pa adulto mayor na Aruba 2025-2040

AAG Financial Services bou di guia di sra. Alida de Jong, tabata encarga pa traha e rapport aki.  E punto di salida di e rapport ta cu gobierno tin di prercura pa e cuido di adulto mayor di Aruba ta di bon calidad, pagabel y accesibel.

Actualmente 18,9% di e poblacion di Aruba ta 65 aña of mas, 13,3% tin por lo menos 1 limitacion, 10% mester di ayudo cu trabao di cas of cuido personal, 5,1% ta den mal/hopi mal estado di salud, 2,4% ta biba den un cas di cuido y 150 persona ta riba e lista di espera di SABA. Teniendo na cuenta cu e poblacion di Aruba ta pasando door di un periodo di embehecemento, e ta sumamento importante pa haya un bista di e costonan relata na e cuido di nos adultonan mayor. No solamente a calcula e costonan actual, pero tambe a haci un proyeccion di e desaroyo di e costonan te cu 2040.

Pa haci e calculacion di e costonan di cuido a tene na cuenta 3 factor:

1. E cantidad di persona cu tin necesidad di cuido.
2. E tipo y intensidad di cuido cu e personanan tin mester di dje.
3. E costonan di personal, vivienda y inventario relaciona na e cuido pa adulto mayor.

E resultado di e calculacionnan haci a indica cu pa 2025 un total di 2.825 persona mester di cuido:

• 2.160 persona (76%) lo mester di cuido na cas 
• 665 persona (24%) lo mester di cuido den un cas di cuido.

Den 15 aña di tempo, e cantidad di personanan cu mester di cuido lo aumenta cu 87% na un total di 5.276 persona.

A base di e cantidad di persona cu mester di cuido y e costonan relaciona cu e tipo di cuido cu nan tin mester, a calcula cu na 2025 e costo total lo suma na 102,9 miyon florin. Maske e cantidad di persona cu mester di cuido den un cas di cuido ta casi 3 biaha menos cu e cantidad di persona cu mester di cuido na cas, e cuido den un cas di cuido ta mas costoso cu e cuido na cas;

• Cuido na Cas 44,3 miyon florin
• Cuido den Cas di Cuido 58,6 miyon florin

Pa e motibo aki a traha 2 scenario den cual a calcula e costo total di e cuido si logra pa baha e cantidad di persona cu mester cuido den un cas di cuido cu 50% of 75%. E resultado di e scenarionan aki a indica claramente cu un reduccion di e cantidad di personanan cu mester cuido den un cas di cuido lo significa un reduccion substancial di e costo total di cuido.

• Un reduccion di 75% di e cantidad di personanan cu mester di cuido den un cas di cuido lo nifica un reduccion di costo di 47% pa 2040.

Conclusion

E resultado di e rapport a indica cu pa e sostenibilidad financiero di e cuido pa adulto mayor, e ta crucial pa trece cambio structural y enfoca pa duna e cuido na e adulto mayor lo mas posibel na cas.