Controlaria General (AR)
Controlaria General di Aruba (Rekenkamer) ta encarga cu investigacion riba efectividad y legitimidad di entrada y gasto di Pais Aruba. Controlaria General ta haci su trabou independiente di Gobierno y e ta raporta na Parlamento. Parlamento ta uza e rapportnan di Controlaria General den cuadra di su tarea di supervisor.
Controlaria General no ta e supervisor, e ta suministra Parlamento cu informacion pa asina Parlamento por ehecuta su tarea di supervisor.
31 di augustus 2012 e minister di Finansas a entrega Parlamento e cuentanan annual, di desde 1986 te cu 2011 di Pais Aruba. Ademas a entrega, na tempo segun ley, riba e dia aki na Parlamento, e cuenta anual di 2011. Esaki ta pa prome bes cu a entrega un cuenta anual na tempo na Parlamento. Tambe a entrega na Parlamento e rapportnan di Controlaria General tocante e añanan presupuestario di 1986 te cu 2011 y a publica esakinan tambe. Esaki ta un stap importante pa yega na un mihor dunamento di cuenta di prestacion di gobierno y e recursonan cu nan a uza . Esaki ta un parti esencial di bon gobernacion.
Na 2011 presidente di Parlamento, Prome minister, minister di Finansa y presidente di Controlaria General a firma un Memorandum of Understanding, den cual a palabra cu pa mas tarda prome di september 2012 e cuentanan anual lo ser entrega na Parlamento. Alabes lo entrega e cuenta anual di 2011 separadamente den un proyecto di ordenancia nacional pa formalisa e cuenta anual manera lo sosode di awor padilanti tur aña.
Gobierno ta duna cuenta na representante di pueblo door di entrega cuenta anual na Parlamento. E cuenta anual mester refleha, banda di un estado di entrada y gasto, actonan di e ministernan durante e aña di gobiernacion anterior, e pakico di nan actonan, e meta cu nan kier a logra y cual tabata finalmente e resultado di e actonan. Esaki lo ta e prome bes cu Parlamento lo trata un cuenta anual di Pais Aruba.
Prome cu Controlaria General a entrega e cuentanan anual na Parlamento ya nan a investiga y a controla nan. Hunto cu e rapportnan di Controlaria General, e reaccion di minister di Finansa riba locual cu Controlaria General a constata, tambe a keda entrega na Parlamento. Di e manera aki Controlaria General ta asisti Parlamento den su tarea di controla Gobierno y e tratameno den parlamento di e cuentanan anual.
Link externo: