Durante 3 luna, a haci 12 bishita na un cas di nos grandinan hunto cu 4 escritor local y a deleita e habitantenan cu storia bunita y unico.

Esaki ta e di 14 aña cu ta haci esaki. Sr. Marco Christiaans, Belen Kock-Marchena y su pareha Dolfi Kock, hunto cu Ruthy Vrieswijk, a carga e programa di biblioteca su proyecto ‘Conta Cuenta na Cas di nos grandinan’. Nan a duna nan aporte den forma di conta storia, recita poesia, canta y toca musica.

Sr. Marco Christiaans ta contado di storia y autor di e buki ‘ Perseverancia ’. ‘Perseverancia’ ta un storia di e pescadonan di e area di Noord (Montserrat). Sr. Christiaans tin hopi conocemento di e bida di antes na Aruba y a conta tocante casamento di antes y con esey tabata bay.

Sra. Belen Kock-Marchena ta conoci pa su poesia y biblioteca tin varios di su publicacionnan den nan coleccion, manera ‘ Mas leu cu horizonte ’, ‘ Den bena di bida ’ y ‘Vibrashon di amor’. Belen a traha hunto cu su casa y su yiu homber riba diferente otro publicacion.

Dolfi Kock a skirbi buki pa mucha manera ‘ E bruha brabo ’, ‘ Bon mucha???... tur dia!!’ , ‘ E gulido golos ’. Tanto Belen como Dolfi a traha hopi aña den enseñansa na Aruba y tur dos ya ta pensiona, pero activo y semper dispuesto pa conta storia y recita poema. A haci un sketch imitando e papia di diferente cultura, manera di Corsou, Boneiro y Surnam. Tambe nan a canta hunto cu nos grandinan y conta storia y custumbernan di antes.

Ruth Vrieswijk-Bergen a publica su coleccion di poema titula ‘ Alegria di Ruthy ’ y ‘ Poemanan di Ruthy ’, ‘ Sigui...inspira pa duna ’, ‘ Mi bida den un dia. Den silencio ’ y e tin su propio columna den Bon Dia cu yama ‘Sabiduria den nos alegria’. Ruth a interactua cu nos grandinan pa medio di poesia, canticanan crioyo y un storia cu e mes a skirbi. Tambe Ruth a declama poesia di otro poeta cu tin nificacion profundo pa nos grandinan. Ruthy a pasa un cusinchi di curason cora rond pa tur esnan presente brasa y asina comparti algo di nan sentimento.

Despues di e prome parti, biblioteca a sigui cu un pelicula cortico cu tema di ‘e prome bishita di enamora na cas’, ‘San Juan’ y ‘Pidimento di man di antes’. Hunto a presenta un bunita mainta pa nos grandinan.

Di e manera aki biblioteca ta contribui cu actividadnan alegre y informativo y hibando literatura pa nos grandinan cu ta biba den e diferente cas pa nos grandinan manera e.o. Paviljoen San Pedro, Huize Maris Stella Savaneta, SABA San Nicolas y Cas Marie Savaneta. Service Club ‘International club of Quota Aruba’ a duna sosten financiero pa e proyecto aki.