Constelacion
Minister President hunto cu su siete ministernan ta forma e ‘gabinete’. E gabinete complementa cu Gobernador ta forma gobierno. Gobierno ta stipula e maneho pa e pais y Parlamento ta controla. Ademas Gobierno di Aruba ta nombra un Minister Plenipotenciario na Hulanda.
Ministro Plenipotenciario ta atende e interes di Aruba na Hulanda y e ta miembro di Conseho di Ministro di Reino pero no di e kabinete na Aruba. Contrario na Hulanda, Aruba no conoce secretario di estado. Entrante 20 di september 2021 e constelacion di e kabinete ta como lo siguiente:
| Minister | Nomber |
|---|---|
| Minister President Minister di Asunto General, Innovacion, Organisacion Gubernamental, Infrastructura y Planificacion Teritorial | Sra. mr. Evelyna C. Wever-Croes |
| Minister di Asunto Economico, Comunicacion y Desaroyo Sostenibel | Sr. mr. Geoffrey B. Wever |
| Minister di Transporte, Integridad, Naturalesa, y Asunto di Adulto Mayor | Sr. Ursell M. Arends |
| Minister di Finansas y Cultura | Sra. mr. Xiomara J. Maduro |
| Minister di Husticia y Asuntonan Social | Sr. Rocco G. Tjon |
| Minister di Labor, Integracion y Energia | En conexion cu e retiro di Sr. G.F. Croes entrante 11 di october 2024, Sr. R.G. Tjon, Minister di Husticia y Asuntonan Social, lo ta encarga cu e liderasgo y responsabilidad di Ministerio di Labor, Energia y Integracion. |
| Minister di Salud Publico y Turismo | Sr. Danguillaume P. Oduber |
| Minister di Enseñansa y Deporte | Sr. Endy J.H. Croes entrega su retiro riba 16 di october 2024. Minister di Salud Publico Sr. Dangui Oduber lo ta encarga cu e liderasgo y responsabilidad di Ministerio di Enseñansa y Deporte. |
| Minister Plenipotenciario interino na Hulanda | Sr. Juan E. Thijsen |
| Secretario di Conseho di Minister | Sra. Grace Mary Koolman |
Gobierno
Gobernador di Aruba ta e representante di e hefe di estado Hulandes (actualmente Rey Willem-Alexander). Su funcion ta parti den dos: e ta atende interes di Reino y e ta cabes di Gobierno di Aruba. Sinembargo e no ta forma parti di e gabinete Arubiano. Ora cu ta menciona Gobernador como hefe di Gobierno di Aruba ta referi na Gobernador como organo di e pais Aruba. Den su otro funcion nos ta referi na Gobernador como un organo di Reino. Den tur dos funcion Gobernador mescos cu e Rey tin inmunidad y no por demanda nan. Nunca nan por aparece dilanti di huez. Durante formacion di gobierno, Gobernador ta hunga un rol importante. Hefe di estado Hulandes ta nombra Gobernador pa un periodo di seis aña. Na final di e periodo por prolonga e nombracion solamente pa un periodo mas di seis aña (pues maximo di diesdos aña).
Ta nombra Gobernador pa medio di un Decreto di Reino (K.B.) despues cu Gobierno di Aruba a entrega un proposicion. Un K.B. ta un decision di gobierno di Reino y e Rey ta firma esaki hunto cu un of mas ministro di Reino. Prome cu e periodo di seis aña di e Gobernador pasa, por bolbe nombr’e como Gobernador. Gobernador ta huramenta dilanti di e Rey ora cu e asumi su cargo. Esaki ta sosode na Hulanda. Na Aruba ta celebra e nombramento cu un reunion solem di Parlamento, na unda Gobernador ta entrega un copia di e decreto di su nombramento. Asina su nombramento ta bira conoci pa henter comunidad Arubiano.
Ta nombra Gobernador pa medio di un Decreto di Reino (K.B.) despues cu Gobierno di Aruba a entrega un proposicion. Un K.B. ta un decision di gobierno di Reino y Rey ta firma esaki hunto cu un of mas ministro di Reino. Prome cu e periodo di seis aña di e Gobernador pasa, por bolbe nombr’e como Gobernador pa e proximo seis aña. Gobernador ta huramenta dilanti di Rey ora cu e asumi su cargo. Esaki ta sosode na Hulanda. Na Aruba ta celebra e nombramento cu un reunion solem di Parlamento, na unda Gobernador ta entrega un copia di e decreto di su nombramento. Asina su nombramento ta bira conoci pa henter comunidad Arubiano.
Minister
Parlamento ta nombra e ministernan pa mesun periodo legislativo di Parlamento. Ta depende di e resultado di eleccion si mesun mimister lo bolbe ser nombra.
Tanto e nombramento como e retiro di minister ta sosode pa medio di un decreto nacional. Fuera cu Gobernador ta firma e decreto nacional, Minister President tambe ta firma (contra firma). Ora di un eleccion nobo e procedura ta cana un tiki otro. Gobernador y e Minister President nobo ta firma e decreto nacional cu ta retira Minister President saliente y cu alabes ta nombra su sucesor. Pues e Minister President nobo ta firma su mesun decreto di nombramento y e decreto di retiro di su antecesor.
Tur minister hunto ta forma Conseho di Minister. Constitucion di Aruba ta permiti pa nombra un maximo di nuebe minister. Minister President ta fungi como e presidente di Conseho di Minister. Constitucion di Aruba ta haci mencion tambe di e funcion di Minister President explicitamente. Conseho di Minsiter ta e organo central cu ta hiba e maneho general di e Pais. Minister President ta haci esaki conoci na comunidad.
Bo mester tin por lo menos 25 aña di edad pa bo por bira minister. Tambe bo mester tin e nacionalidad Hulandes y bo no por ta exclui di e derecho di voto. Ademas un minister no por ta na e mesun tempo entre otro Gobernador interino, tampoco miembro di Conseho di Consulta ni un empleado publico activo of hues.
Por pasa cu un minister no ta sinta e periodo completo di cuatro aña. Esta e por tuma su retiro of por oblig’e pa baha como minister. Retiro boluntario ta semper posibel. Retiro obligatorio ta sosode pa medio di un mocion di desconfiansa di Parlamento. Esaki por sosode den caso cu segun Parlamento e minister a haci fout(nan) grave. E minister tin obligacion pa responsabilisa su mes na e representacion di pueblo (Parlamento).