Condominium "Solo 1" den caya grandi lo yuda revitalisa Oranjestad

E proyecto di condominium "Solo 1", lo ta situa den Caya Betico Croes, otro banda di Ex Bon Bini Bazaar na Oranjestad. Minister Wever a remarca cu e ta un ehempel di un componente esencial di nos vision conhunto pa transforma e area di centro di ciudad den un centro di viviendo y gastronomia.

E proyecto ta un aporte valioso di sector priva pa revitalisacion esencial di Oranjestad, crecemento sostenibel, como tambe prosperidad di nos comunidad.

Proyecto Solo 1 no solamente lo contribui na e transformacion fisico di e area, sino tambe lo yuda stimula desaroyo adicional cu lo atrae individuonan y negoshinan, fomentando oportunidadnan economico.

Minister Wever ta gradici desaroyador, sr. Antonio Caralps y su esposa Taryn, como tambe sector priva pa nan confiansa y empuhe den sostene e esfuersonan aki pa hunto crea un futuro prospero y dinamico pa Oranjestad y su habitantenan.