Competencia
Un di e tareanan mas importante di Parlamento ta pa traha hunto cu Gobierno riba creacion di ley (ordenansa nacional). Un Ministro ta entrega un proyecto di ley pa tratamento na Parlamento. Den un reuniion publico Parlamento ta trata e proyecto di ley, cu mester haya mayoria den Parlamento pa e proyecto di ley keda aproba. Banda di e poder legislativo aki, Parlamento tin tambe e deber di supervisa y controla e maneho di Gobierno.
Pa eherce su tarea, Parlamento tin diferente competencia:
- Derecho di iniciativo: Parlamento por inicia un proyecto di ley. Cada miembro di Parlamento tin derecho pa inicia un proyecto di ley. Pa esaki e tin e competencia pa pidi ayudo di un departamento of servicio di Gobierno pa formula e proyecto di ley;
- Derecho di amienda: Parlamento tin derecho di haci cambio den proyecto di ley cu a wordo entrega pa tratamento den Parlamento prome cu nan aprob'e;
- Derecho di haci pregunta: E miembro di Parlamento tin e derecho di haci un Ministro pregunta tocante e maneho cu e ta hiba;
- Derecho di interpelacion: Banda di e derecho di haci pregunta, e miembro di Parlamento tin tambe e derecho di exigi di un Ministro pa e responsabilisa su mes pa e maneho cu e ta hiba;
- Derecho di presupuesto: Un miembro di Parlamento tin e derecho di tin un bista cla ariba entrada y gasto di Gobierno;
- Derecho di encuesta: Esaki ta un forma profundo di controla e maneho di un of mas Ministro. Door di eherce e derecho aki, Parlamento ta haya e oportunidad pa envolvi y haci pregunta na instancia y personanan pafor di e aparato gubernamental ora cu ta investigando un asunto di maneho mas profundo.