Colegio Laura Wernet Paskel a ricibi Chromebooks y Tablets for di Edutech

 Gobierno a pone 400 mil florin disponibel pa reparti den 4 diferente ciclo di Edutech. Como un di e scolnan ganador, Colegio Laura Wernet Paskel recientemente a ricibi nan chromebooks y tablets cu lo uza den 1ste y 2de klas.

Esaki sigur ta hermentnan cu lo facilita e maestronan grandemente na momento di duna les.

Prome Minister Evelyn Wever-Croes, den nomber di Gobierno di Aruba, ta gradici tur scol cu a participa na e proyecto di Edutech durante e ultimo aña escolar y ta encurasha tur scol cu no a participa of gana, pa participa den e siguiente aña escolar, pa asina tambe tin e oportunidad pa gana material digital pa nan scol.

"Educacion ta e fundeshi pa nos pais por prospera, ta empodera nos habitantenan, fortifica nos comunidad y ta dirigi progreso. Nos sa tambe cu nos mundo ta cambiando na un nivel hopi rapido. P’esey e ta hopi importante pa nos ekipa e generacion di hoben cu e hermentnan necesario pa por maneha e retonan y oportunidadnan den e era digital. E unico manera cu por garantisa esaki ta door di siñanan e habilidadnan di siglo 21 pa nan por adapta y ta exitoso", Prome Minister Wever - Croes a enfatisa.