Sra. Bermudes di Centro di Hoben y Famia a splica cu e nan ta un departamento preventivo di DAS, cu tambe ta colaborando cu e proyecto piloto aki. DAS y DPL a inicia cu algun sesion pa tur esnan cu ta buscando trabou.

Esnan den necesidad pa un trabou pa inscribi na DPL pa asina por asisti na e sesionnan aki y siña un tiki mas di con pa traha riba desaroyo personal, para keto na tur e facetanan cu tin mester y cu ta importante pa nan cu ta buscando trabou, pa ta miho prepara na momento di un entrevista. Centro di Hoben y Famia lo tin 2 facilitado cu lo ta forma parti di e proyecto piloto aki, cu lo splica y duna informacion importante, yudando asina tur esnan cu ta buscando trabou.

Un workshop cu lo tin un duracion di 5 siman cu diferente facilitado, cu ta bay enfoca riba preguntanan cardinal manera “ken mi ta?, kico mi kier?, kico mi por?, kico mi ta gusta?” pa yuda e participante descubri su talento y cualidadnan.Durante e curso tambe lo instrui e cursistanan riba nan debernan como tambe nan derechonan laboral. Na final di e curso tur participante lo ricibi un certificado di reconocimento.

E iniciativa aki ta sumamente importante pasobra cu, a pesar cu desempleo ta bahando na Aruba, Gobierno kier haci tur empeño pa yuda cualkier persona cu ta buscando y no ta hayando trabou. Gobierno kier yuda esnan den desempleo haya trabou y kier yudanan mantene un trabou.

Na final di e Trayecto pa Progreso Personal y Laboral, DPL lo percura pa cada un cursista haya entrevista cu mas cu un dunado di trabou.