Centrale Accountantsdienst (CAD)

Vision/Mision

Nos ta profesionalnan competente y integro cu ta sirbi e interes general obhetivamente y imparcial door di ofrece siguransa. Nos ta ehecuta e mision aki cu hopi atencion (cautela) y experticio na servicio di gobierno y comunidad.

E balornan fundamental cu ta guia nos ta:

• Integridad -  Nos ta husto y sincero;
• Traha den ekipo -  Nos ta traha hunto pa realisa metanan colectivo y individual;
• Pasion - Nos obhetivo ta pa semper sigui supera nos mes;
• Proactividad - Nos actitud ta di anticipa y busca solucion.

Lema

Profesionalnan integro y imparcial

Servicio Central di Accountant (Centrale Accountantsdienst) ta e servicio interno di accountant pa Pais Aruba. CAD ta resorta bou di ministerio di Finansas y Organisacion Gubernamental.
CAD ta controla e cuenta anual di Pais Aruba y suminstra un declaracion di accountant. E cuenta anual di Pais Aruba ta un documento importante pasobra pa medio di esaki Gobierno ta responsabilisa su mes na Parlamento tocante e maneho financiero cu el a hiba. Ademas di controla e ministerionan, CAD ta encarga tambe cu controla e companianan di gobierno y di cierto personanan huridico cu tin relacion cu Pais Aruba.

Pa yega na un declaracion di accountant, CAD ta controla e administracion financiero di e departamentonan di Gobierno. Como e accountant interno, CAD tin conocemento amplio di e organisacion y proceso di trabou di e ministerionan, servicio y departamento. Pesei CAD ta conseha tocante maneho di risico riba e tereno di:

• Confiabilidad den dunamento di informacion financiero y operacional;
• Efectividad y eficiencia di e proceso di trabou;
• Seguridad di propiedad;
• Cumplimento di ley y areglo di contracto.

Normalmente CAD ta haci investigacion ariba propio iniciativa. Ta scoge e proyectonan pa investiga a base di e balotacion di risico y e interes financiero. Ademas ta haci investigacion ariba peticion di Ministro y management di servicio y departamento.

CAD ta traha un rapport di cada investigacion y ta entreg’e na e ministronan concerni. Camara di ControlariaGeneral (Rekenkamer) y management di e departamento concerni tambe ta haya un copia di e raport.