Casonan di ‘kinkhoest’ na Aruba
ORANJESTAD - For di aña pasa diferente pais den e continente Europeo y Mericano a bati alarma riba aumento drastico di casonan di ‘Kinkhoest’ of tambe yama ‘Whooping Cough’. Aruba como pais cu ta ricibi bishitante for di e paisnan aki, recientemente tambe a nota un aumento den e cantidad di caso.
Desde 2024 te cu awo, tin un total di 6 caso positivo registra na Aruba, di cual 2 ta baby cu ta interna y uno den estado critico.
‘Kinkhoest’ ta un malestar respiratorio ocasiona pa un bacteria. Door di tosa of nister, un persona infecta por transmiti e bacteria aki y asina infecta otronan a traves di nan boca of nanishi. E prome sintoma di ‘Kinkhoest’ ta cuminsa similar na un griep regular unda e nanishi ta cuminsa core awa, tosamento leve, keintura y nistermento. Despues di e prome sintoma, e malestar ta desaroya den tos severo y persistente, sacamento despues di tosamento y cansancio.
Adulto-, hoben- y muchanan cu ta vacuna contra e bacteria di ‘Kinkhoest’, ta experencia esaki como un simpel griep pero pa baby menor di 2 luna cu ainda no a ricibi nan vacuna DKTP, muchanan cu no ta vacuna of no ta vacuna optimalmente y e adulto mayor cu un salud fragil, “Kinkhoest’ por ta severo y hasta mortal. Debi na e tos intenso e baby, mucha of adulto por cuminsa saca, asfixia, perde conocemente y por fayece.
Durante december 2024, Aruba a registra 3 caso di “kinkhoest” cual dos caso ta baby bao di 1 aña di edad. Esaki normalmente ta un averahe pa aña di e cantidad di “kinkhoest” registra na Aruba. Den 2024, un total di 6 caso di “kinkhoest” confirma a keda registra.
Departamento di Salud Publico (DVG), ta alerta comunidad pero particularmente mayornan cu baby
chikito cu no a ricibi nan prome vacuna ainda pa evita di expone nan baby na demasiado persona of na personanan cu tin sintoma di griep. DVG ta conseha personanan cu ta experenciando sintomanan respiratorio, pa nan proteha otronan door di bisti tapa boca. Tambe e adulto mayor cu salud delicado mester ta consciente y practica higiena di man frecuentemente pa evita di transmiti e bacteria of keda infecta cu esaki. Ta conseha pa laba man prome cu come y semper prome cu mishi of duna cuido na baby. Pa e hende muhe na estado ta recomenda pa e vacuna contra ‘kinkhoest’ entre 27 y 36 siman di embaraso pa di e forma aki su baby por nace cu poco immunidad pa e bacteria.
DVG dentro di e siguiente dianan lo informa comunidad debidamente riba desaroyo di e casonan na Aruba. Pa mas informacion "Like" e Facebook page Directie Volksgezondheid DVG Aruba,
Follow DVG riba Instagram directie_volksgezondheid_aruba, bishita www.dvg.aw, yama 5224200 of manda bo email na servicio@dvg.aw/
