Cantidad di sangura na Aruba ta preocupante
ORANJESTAD - Seccion di Gele Koorts en Muskieten Bestrijding (GKMB) di Departamento di Salud Publico ta alerta comunidad cu actualmente nan ta hayando masha hopi casnan cu criadero di sangura.
Esaki ta causa cu e populacion di sangura ta hopi halto y esaki ta causa molester y trece peliger pa nos comunidad. Controlnan haci den diferente bario rond di Aruba ta indica cu e problema aki ta presente den tur districto di Aruba.
Departamento di Salud Publico (DVG) ta urgi comunidad pa tuma accion y tira bista rond di cas of espacio unda ta biba y bolter tur obheto cu ta retene awa, despues di cada yobida. Den caso cu ta acumula awa pa cualkier proposito, mester tapa y tuma precaucion pa evita cu e ta bira un criadero di sangura.
Aumento grandi den populacion di sangura riba nos isla ta nifica peliger pa brote di malesanan transmiti pa sangura manera entre otro Dengue, Zika y Chikungunya. Reduccion di e populacion di sangura ta rekeri accion di nos cada un como ciudadano. Seccion di GKMB so no por controla tur cas na Aruba y mirando e cantidad di yobida diario e ta rekeri control regular rond di cas pa awa cu ta keda para.
Pa algun aña caba seccion di GKMB ta implementando un maneho pa cu cuido y proteccion di nos flora y fauna y no ta core rond spuit barionan mas cu veneno, cu excepcion si tin casonan positivo di malesa transmiti pa sangura den e area. E maneho di antes unda tawata core rond spuit veneno alabes no ta uno efectivo mirando cu tanten cu tin awa para rond di casnan, e sanguranan lo sigui broei.
Pa mas informacion
- Like Directie Volksgezondheid DVG Aruba su Facebook page;
- Follow directie_volksgezondheid_aruba riba Instagram;
- Bishita www.dvg.aw;
- Yama DVG na 5224200;
- Manda bo email na servicio@dvg.aw.
