A fabrica e prome piano di orgel na Alemania y su popularidad a plama lihe den henter Europa. Nan ta conoci tambe como piano orgel, orgel di caya of orgel di cilinder y na Aruba Cahi’orgel, Caha di musica of Tingilingi-box. E nomber di orgel ta confundi hende, pasobra e no tin un pipa di orgel, pero door cu e ta origina di un orgel di cilindro e nomber a keda mescos.” E ta un tipo di instrumento di caya cu tin un mecanismo di piano basta simpel unda un cilinder cu diferente punto riba dje ta saca musica door di draai e man.

E prome Caha di orgel a yega Aruba na final di siglo 19 y no a dura hopi prome cu a graba (claba) musica di Aruba mes riba cilinder. Rufo Wever (8 december 1917-31 december 1977) a cuminsa graba rond 1940 piesa musical riba cilinder. Despues di esey Alfonso Boekhoudt (20 april 1943) a tuma e trabou aki over. No ta tur sorto di musica por pone riba Caha di orgel, pasobra e cilinder tin solamente mita di e cantidad di e notanan musical di un piano normal. Musica cu si por pone riba e caha ta entre otro wals, mazurka, danza y tumba. E grupo di caha di orgel ta consisti di e Caha di orgel mes e persona cu ta draai e man y e persona cu ta toca wiri.

Fuente: Wikipedia