Pa Gobierno salud mental ta un prioridad, sinembargo no por realisa e vision si no tin esnan den e veld pa ehecuta esaki. Durante di e bishita tabatin e oportunidad pa intercambia pensamento cu e empleadonan di e stichting pa combati problema di salud mental na Aruba.

Intencion di e centro ta, pa brinda ayudo pa salud mental cerca mucha, hoben y adulto. Un hende cu tin mester di ayudo, por acudi na e centro y ta haya ayudo lihe sin cu mester warda simannan largo. E centro lo tin un auditorium unda cu scolnan por duna charla, curso y training pa asina contribui na pone e tema di salud mental halto riba agenda di tur hende, tanto den educacion como den hogar.

“Aruba ta den recuperacion, economia ta recuperando, turismo ta recuperando pero a keda cu hopi problema despues di pandemia y un di nan ta problema di salud mental riba nos pais cu a bira mas grandi,” Prome Minister a expresa.

Prome Minister a gradici Minister Tjon conhuntamente cu su ekipo y demas profesional den e veld, pa traha duro pa bin cu solucion pa e problema serio aki cu tin na Aruba.