Prinses Beatrix ta di bishita na Aruba riba invitacion di DCNA. Durante su estadia, Prinses Beatrix a bishita Neptali Henriquez Park caminda cu e Prinses a ricibi un cordial bon bini di studiantenan di Reina Beatrix School y Sint Paulus School. Na Neptali Park director di Fundacion Jantje Beton, sr. Dave Ensber-Kleijkers, director di CEDE Aruba, sr. Daniel Tecklenborg y sr. Roy Mezas di Stichting Neptali Henriquez a duna Prinses Beatrix un recorido den e speeltuin y na final e Presidente di Jantje Beton, hunto cu Prinses Beatrix a haci entrega di un cheque di 1.5 miyon Euro pa inverti den 2 speeltuin nobo na Aruba.

Despues di Neptali Park, Prinses Beatrix a bishita Telefon pa Hubentud. Aki Prinses Beatrix a haya un splicacion amplio di e trabao importante di Telefon pa Hubentud y tabatin e honor di desvela e logo nobo di Telefon pa Hubentud.

Diahuebs atardi, Prinses Beatrix a bishita Rooi Taki, cu ta un area cu ta cay bao proteccion di Parke Nacional Arikok. Tyson Lopez, CEO Fundacion Parke Nacional Arikok a ricibi Prinses Beatrix y a duna e prinses un splicacion amplio di e trabao di mantencion di e mangroven, conservacion di shoco y preservacion di coral den e parke marino.

Diabierna mainta, Prinses Beatrix a bishita Parke Nacional Arikok, unda nan a cuminsa cu un proyecto pa reintoduci e Lora na Aruba den naturalesa. Riba diabierna merdia , Prinses Beatrix a atende un congreso na Universidad di Aruba, organisa pa DCNA, riba e tema di naturalesa.

Apesar cu e bishita di Prinses Beatrix no tabata un bishita formal, a dune su caluroso bon bini. Prinses Beatrix a duna di conoce di ta contento di por ta back na Aruba despues di seis aña y mira tanto desaroyo.