Na 2022, Fundacion pa Maneho di Adiccion Aruba (FMAA) y Sociaal Psychiatrische Dienst (SPD) a uni y a forma Stichting Hunto cu e meta pa duna cuido psikiatrico y tratamento contra adiccion. Stichting Hunto ta maneha entre otro e "inloophuis" na Meiveld cu ta brinda yudansa na esnan cu problema di adiccion.Ademas, e fundacion a haya fondo di Gobierno pa expande e capacidad di Centro Colorado na unda ta duna tratamento intramural na adictonan.

Antes, e inloophuis tabata conta cu un averahe di cuater pa cinco persona cu ta yega pa yudansa, cual awendia e ta na un averahe di binti cliente, cu ta señala cu e proyecto di bemoeizorg ta cumpliendo cu su obhetivo. Na 2024, e intencion ta pa renoba e infrastructura di e inloophuis na Meiveld.

Na Centro Colorado, e diferente trabaonan ta avansando y unabes esakinan keda cla, e centro lo tin un capacidad pa atende cu 40 cliente, na luga di 17 cliente cu ta e capacidad actual.

Como parti di e renobacion aki, a tene cuenta cu e cambernan caminda ta brinda e cuido, manera e consulta multidisciplinario y  terapia individual como tambe den grupo, ta uno adecua.

Ademas di inversion infrastructural, a haci inversion den e personal, sala di reunion, sala medico, cushina y bañonan.

Gobierno ta satisfecho pa wak tur avanse, y a indica cu lo sigui brinda atencion na e parti di verslavingszorg y a gradici e raad van toezicht, raad van bestuur, pero tambe e personal pa brinda e cuido y e atencion na tur cliente cu tin mester di esaki.