Bishita na Consul General di Hulanda na Miami

Durante e reunion aki a trata varios tema interesante pa cu turismo crucero. E meta di e reunion tabata pa sondia e disponibilidad di parti di e Consulado Hulandes pa asisti Ministerio di Turismo y APA N.V. den diferente proyecto segun vision di Ministerio di Turismo.

Minister di Turismo a comparti e vision di Gobierno pa cu nos turismo cual ta uno di “low volume high impact”. E meta di e vision aki ta pa enfoca mas riba e calidad di turismo en bes di cantidad, haciendo uzo di energia alternativo y sostenibel (climate resilience) y asina haci tur locual Aruba tin di ofrece na nos bishitantenan mas sostenibel pa futuro. A elabora riba e intencion pa inicia conversacion cu Corsou y Boneiro pa bin cu un maneho integral pa crucero entre e islanan aki. Ademas a papia riba e implementacion di e MOU cu Ministerio di Turismo di Aruba y APA a firma cu Jacksonville Port Authority (JaxPort) na maart 2023. E meta di e cooperacion aki ta pa habri e oportunidad pa importa producto, pa medio di JaxPort pa Aruba. Esaki lo percura pa un fluho di producto mas continuo y sigur. Ademas a repasa e tema cu lo enfoca riba dje durante e Seatrade Cruise Global Convention 2024, cual ta pa sondia e posibilidad pa introduci ShorePower pa cruceronan cu ta ancra na Aruba. ShorePower ta duna cruceronan cu ta mara na waf, e oportunidad pa “charge” nan ekiponan electronico abordo, uzando energia alternativo sostenibel ofreci na Aruba mes.

Consul General sra. Lisette den Breems a sigura cu lo duna su sosten na e diferente plannan cu a presenta den e reunion pa cu e futuro di turismo crucero na Aruba y e otro islanan cu ta forma parti di Reino Hulandes.