Bishita exposicion ‘Mosaik Picassiette’ na biblioteca

Esaki a resulta di ta diferente, special y exitoso. Ta pesey a prolonga esaki y duna mas artesano e oportunidad pa wak e tecnica aki. E exposicion bunita aki ta habri te dia 21 di maart, durante orarionan cu biblioteca ta habri.

Mientras arte di mosaik tradicional  ta uza pida chikito di mosaik, ‘pique assiette’ ta uza pida di tayo corta pa forma un obra di arte. Na Frances e palabra ‘Pique Assiette’ ta nifica “recogedo di tayo” of  “ladron di tayo” y ta referi na uza tayo of recicla tayo kibra, sobra di glas y traha arte cu esaki. Un ehempel di picassiette tin na Chartres, Francia. E Maison Picassiette ta e trabou increibel di e artista Raymond Isidore. Ela nace casi na e mes un tempo cu Gaudi (artista renombra di Spaňa). Isidore, cu a siňa e technica su mes a cuminsa decora su cas. A ser bisa cu e tabata recoge y colecta tayonan di dumpnan y tambe tabata haya donacion di otro hende. Sin ningun training den arte Isidore a pone e pida pidanan den cement y peganan riba e murayanan di su cas cu asina a bira un obra di mosaik. 

Awendia, ‘La Maison Picassiette’ ta un destinacion turistico na Francia. Mas artistanan a sigui traha obranan cu tayo. Asina ta, si bo kibra un tayo bo ta bay mir’e na un manera diferente. Tayo no ta pa pone cuminda so, pero por traha obra di arte tambe cune. 

Pa mas informacion por tuma contacto cu Enrita Werleman na Ate Mosa tel. 661 3200.