Biahando Semana Santa? Atencion pa casonan di sarampi aumentando mundialmente

Sarampi, miho conoci como Measles, ta un malesa infeccioso hopi contagioso cu ta transmiti di hende pa hende pa medio particulanan cu ta keda bula den aire despues cu un persona infecta tosa of nister. Sarampi ta afecta e via respiratorio y despues ta plama den full den e curpa. 

Sintomanan ta:  

• Keintura halto;
• Tosamento;
• Nanishi ta core;
• Wowitis (wowo cora);
• Por tin mancha blanco chikito den boca;  
• Rash cu ta cuminsa na cara y ta plama pa e curpa completo.  

Muchanan no vacuna, hende muhe na estado of esnan cu un sistema inmunologico comprometi (debil) debi na malesa of edad halto ta esnan mas vulnerabel pa desaroya complicacion cu por conduci hasta na morto manera:  

• Pulmonia;
• Encefalitis (inflamacion di celebro);
• Complicacion durante embaraso (spontaneus miscarriage, premature birth, congenital complications). 

Departamento di Salud Publico ta conseha tur biahero pa investiga e destinacion, si eynan tin casonan di Sarampi. Si esaki ta e caso, tuma accion pa proteha bo mes door di evita contacto cu hende malo cu sintoma respiratorio.

Esnan naci prome cu 1970 y ta biahando pa areanan cu casonan di Sarampi, DVG ta conseha pa pasa busca un vacuna di Sarampi prome cu biaha. Ciudadanonan naci prome cu 1970 a ricibi solamente 1 vacuna di Sarampi ora nan tabata mucha y ricibiendo un vacuna atrobe lo yuda boost e sistema inmunologico contra e virus aki.

Prijs pa e vacuna contra Sarampi  ta Awg. 60,- y ta disponibel na seccion di Malesanan Infeccioso di DVG situa na Avecina straat# 1. Pago ta solamente posibel cu Debit card. 
No mester traha cita pa busca e vacuna aki, por simplemente walk-in di dialuna pa diabierna for di 7:30 pa 11:45 di mainta y entre 1:15 cu 3:30 di atardi.

Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na servicio@dvg.aw.