Tin posibilidad tambe pa entrega un carta di obhecion den caso cu gobierno (a) laga di tuma un decision riba peticion di un cuidadano of compania. Si despues di diesdos siman cu un persona of compania a entrega un peticion y ainda e no a ricibi un decision ariba su peticion, por considera esaki como si fuera cu (instancia) gobierno a nenga e peticion (nengamento ficticio). E ora ey interesado por entrega un carta di obhecion. E carta mester ta entrega dentro di ocho siman despues cu e diesdos simannan a pasa.

E carta di obhecion mester ta dirigi na e instancia cu a tuma e decision of cu a keda sin tuma un decision. Den mayoria caso den e decision mes, ta para ta na cual instancia mester entrega un carta di obhecion. Mester dirigi e carta di obhecion na e ministro concerni y mester entreg’e na e instancia menciona. Tambe mester entrega un copia di e carta di obhecion na e secretariado di Comision di conseho di obhecion di LAR (Bezwaarcommissie LAR).

E carta di obhecion mester tin lo siguiente:

• nomber, adres y firma di esun cu ta entreg’e;
• motibo pa cual ta entrega e carta di obhecion;
• e decision contra cual ta haci obhecion;
• fecha di e carta di obhecion (e carta di obhecion mester ta entrega dentro di seis siman despues di e fecha di e decision of den caso di un decision ficticio dentro di ocho siman).

Procedura di obhecion LAR  

Si e carta ta cumpli cu tur exigencia aki riba menciona, e instancia concerni mester manda dentro di dos siman, e carta di obhecion pa Comision di conseho di obhecion di LAR.

E comision ta consisti di personanan cu ta independiente di e instancia di gobierno cu a tuma e decision. Nan tin tarea pa conseha e instancia di gobierno encuanto decision cu mester tuma riba e carta di obhecion.
Despues di esaki, esun cu a entrega e carta di obhecion, ta haya un invitacion pa bin aclarea verbalmente durante un sesion pa scucha. E por bin cu un abogado of un otro representante pero no ta necesario. Ademas lo tin un representante di e instancia di gobierno for di cual e decision a bin.

Despues di maximalmente ocho siman Comision di conseho di obhecion di LAR ta duna conseho na e instancia di gobierno. E instancia di gobierno tin seis siman, despues di a haya e conseho riba e decision di e carta di obhecion, pa tuma un decision.